Bəxtiyar Vahabzadə haqqında elmi araşdırmalar toplusu işıqüzü görüb

TƏBRİK EDİRİK!...

XX yüzil Azərbaycan ədəbiyyatının görkəmli nümayəndələrindən biri - Azərbaycanın xaıq şairi, akademik Bəxtiyar Vahabzadə haqqında elmi araşdırmalar toplusu çap olunub.

Topluda Müşfiq Borçalının "Bəxtiyar Vahabzadənin yaradıcılığında ədəbi əlaqələr və Gürcüstan konsepti" sərlövhəli məqaləsi də dərc olunub.

* * *

“ZiM.Az” xəbər verir ki, “Bəxtiyar Vahabzadə zirvəsi” adlanan kitabı çapa Bakı Dövlət Universitetinin Azərbaycan ədəbiyyatı tarixi kafedrasının professoru Vaqif Sultanlı hazırlayıb.

Kitaba “Həyatın rəngləri, zamanın təzadları, sözün ağrıları” adlı “Ön söz” yazan professor Vaqif Sultanlı şairin yaradıcılığı ilə bağlı düşüncələrini belə ifadə edir: “Bəxtiyar Vahabzadə sənətə yaşadığı dönəmin şərtləri ilə uyuşmayan cəsarət örnəyi gətirib. Özəlliklə, xalqın tarixinə, taleyinə münasibətdə şairin sərgilədiyi barışmaz vətəndaşlıq mövqeyi olduqca önəmlidir. Təkcə yazıları ilə deyil, ictimai mövqeyi ilə də cəmiyyətə cəsarət ruhu verdiyi üçündür ki, ən çətin dönəmlərdə siyasi şəxsiyyətlərə deyil, bir sənətkar kimi ona güvənilməsi burdan qaynaqlanır.
Bəxtiyar Vahabzadənin iki fərqli siyasi sistemdə yaşayıb yaratması, həyatının böyük bir dövrünün imperiya illərinə, daha az dönəminin ölkənin bağımsızlığa qovuşduğu çağlara təsadüf etməsi yaradıcılığının məzmununa təsirsiz ötüşməyib. Lakin imperiya illərinin sərt senzura yasaqlarına baxmayaraq o, milli mövqeyini tərk etməmiş, ideologiyanın əsirinə, rejimin quluna çevrilməmiş, sovet cəlladlarının qanlı repressiyalarından qorxmadan ölümün gözünə dik baxan bir çox sələfləri kimi yazıları ilə ən sərt dönəmlərdə belə həqiqəti söyləməyin mümkünlüyü örnəyini göstərib”.

Bəxtiyar Vahabzadənin anadan olmasının 100 illiyi münasibətilə hazırlanmış kitaba görkəmli elm adamlarının, ədəbiyyatşünasların məqalələri daxil edilib.

Kİtabda Akademik Nizami Cəfərovun “Bəхtiyar Vahabzadə, yaхud millətin şairi”, professor “Cəmil Həsənlinin “Gülüstan” xofu “, professor Bədirxan Əhmədlinin “Bəxtiyar Vahabzadə: İnsan və zamanı düşünən şair”, professor Cavanşir Yusiflinin “Şairin və şeirin başlandığı məqam”, professor Nizami Tağisoyun “İdraki-intellektual poe-ziyanın inkişafında Bəxtiyar Vahabzadənin rolu”, professor Səadət Kəriminin “Bəxtiyar Vahabzadənin həyat və yaradıcılığında ləyaqət”, professor Almaz Həsənqızının Bəxtiyar “Vahabzadə poeziyasının folklor qaynaqları”, professor Əhməd Sami Elaydinin (Misir, Qahirə) “Bəxtiyar Vahabzadə poeziyasında ərəb dünyasının bədii təcəssümü”, dosent Məhəmməd Məmmədlinin “Bəxtiyar Vahabzadənin “Özümüzü kəsən qılınc” əsərində törə-tanrı-xaqan”, dosent Faiq Ələkbərlinin “Bəxtiyar Vahabzadənin dünyagörüşündə Azərbaycan milli ideyası və türkçülük” və başqalarının digər məqalələri ilə yanaşı dəyərli həmkarımız, Azərbaycan Texniki Universitetin əməkdaşı, “Ziya” qəzetinin, “ZiM.Az”, “Ziya.İnfo.Az” və “Elm.İnfo.Az” saytlarının baş redaktoru, filologiya üzrə fəlsəfə doktoru, Prezident təqaüdçüsü Müşfiq Borçalının “Bəxtiyar Vahabzadənin yaradıcılığında ədəbi əlaqələr və Gürcüstan konsepti” sərlövhəli məqaləsi də verilib.

(Borçalı, Müşfiq. Bəxtiyar Vahabzadənin yaradıcılığında ədəbi əlaqələr və Gürcüstan konsepti. //Bəxtiyar Vahabzadə zirvəsi. (Elmi araşdırmalar toplusu), Yayına hazırlayanı, elmi redaktoru və ön sözün müəllifi: Prof.dr. Vaqif Sultanlı. Bakı: Adiloğlu, 2025, 332 s., s.201-228.)

Biz də redaksiya heyətimiz adından, sevimli həmkarımız - çox hörmətli Müşfiq müəllimi ürəkdən təbrik edir və ona yeni-yeni uğurlar arzulayırıq!..


FİRƏNGİZ İBADOVA,
"Borçalı" nəşriyyatının redaktoru,
Elm.İnfo.Az saytının şöbə müdiri

ZiM.Az



.