Sürəyya Yunisqızı (İsmayılova): "ÇIXANDA DƏNİZİN SAHİLLƏRİNƏ"

Möhtəşəm məşhur “Fener” restoranı,
Füsunkar Bodrumu nağıl, əfsanə.
Oxşarı tapılmaz gəzsən dünyanı
Günçıxmamış obaşdan çıx seyrinə
Egey dənizinin sahillərinə.

Ağ atlı şahə qalxan dalğaları
Coşub qucaqlayar boz qayaları.
Yerin, göyün min cür rəngi, suları,
Qırçın ləpələrin pıçıltıları
Musiqi çələngi sahillərinə.

Təbiətin möcüzəsi, qüdrəti,
Bir başqa dünya dənizin səfası.
Türk dünyasının misilsiz sərvəti,
Min dərdin məlhəmi suyu, havası,
Çıxanda dənizin sahillərinə.

Günəş bulud arxasında gizlənər,
Ulduzlar kəhkaşan, ay çılçırağı.
Meh əsər, sahilə şeh səpələnər.
Görünər rəngarəng balıqqulağı,
Çıxanda dənizin sahillərinə.

Qağayılar qayaların üstündə
Sahil boyu yüksələn harayları.
Gecəyarı ay dənizdə çiməndə
Gəlinotağı tək dəniz kənarı
Çıxanda dənizin sahillərinə.

Başı buluda söykənən dağların
Ətəyində mavigözlü mələyi,
Sinəsində əksi günəşin, ayın
Təbiətin ilahi gözəlliyi,
Egey bənzərsiz ezackar lövhəsi.

Bodrum Türkiyənin cənnət güşəsi,
Gözüyaşlı dəniz, yaşıl adalar,
Bir dünya sevinc dəniz gəzintisi,
Bir ovuc torpaqda min hikmət olar,
Gül-çiçək bitirər daşı, qayası.

Əzəməti masmavi ağ məkanlar,
Günəş, qum, dəniz, əvəzsiz səfası.
Gəmi gəzintisi xoş təəssüratlar,
İnan sehirləyir görən hər kəsi
Çıxanda dənizin sahillərinə.

Canlı tarix qədim bodrum qalası
Baş qoyub dizinə dilsiz qayalar.
Gümüşlük bənzərsiz cənnət köşəsi
Dənizin ovcunda günəş, axşamlar
Çıxanda dənizin sahillərinə.

Kainatın gözəllik səltənəti,
Milli Park, Egey dənizi incisi.
Möcüzələr yaradan təbiəti
Fırtına, qasırğa, tufan öfkəsi
Çıxanda dənizin sahillərinə.

Göygözlü dənizin bu gözyaşları,
Üstündə bəmbəyaz bulud karvanı,
Ovcunda günəşin qızıl saçları,
Kövrək pıçıltıları həzin mahnı,
Çıxanda dənizin sahillərinə.


ZiM.Az


.