Gülzar Şərifova: "Bizim xoşbəxt analar"

İnsan

Təkcə bizim əsrdə
Neçə tufan olubdur,
Kim bilir yer kürəsi
Neçə dəfə boşalıb,
Neçə dəfə dolubdur.
Boranlar yer üzündən
İnsanlığın izini
Kəsə bilməyib yenə.
Ey insan, əzəl gündən
Mən heyranam sənin bu
Gücünə, qüdrətinə.
Sən zamanla ucaldın
Əlçatmaz səmalara.
Əməyinlə qovuşdun
Bu əbədi bahara.
Sən zamanla böyüdün,
Zamanla yaşa doldun.
Ey zamanın övladı,
Sən zamanın özündən
Daha qüvvətli oldun!


Bizim xoşbəxt analar

Mən yazmaq istəmirəm
Ötən günlərimizdən,
Acı göz yaşlarını
Yada salmayıram mən.

Mən yazmaq istəmirəm
Çəkdiyiniz dərd-qəmi,
Çünki çoxdan qurumuş
Gözlərinizin nəmi.

Gülür şən üzünüzə
Səadətlə xoş bahar;
Nə qədər xoşbəxtsiniz
Bu gün siz, ey analar!

ZiM.Az

.