ELNARƏ AKİMOVANIN YENİ KİTABI ÇAP OLUNUB

TƏBRİK EDİRİK!..

Bu günlərdə tanınmış tənqidçi, ədəbiyyat-şünas alim, filologiya elmlər doktoru, Milli Məclisin deputatı Elnarə Akimovanın “Azərbaycan uşaq ədəbiyyatı: tarixi təcrübəsi və müasir istiqamətləri” adlı yeni kitabı çap olunub.

“Elm və təhsil” nəşriyyatında işıq üzü görən kitabın elmi redaktoru və ön sözün müəllifi Azərbaycan Milli Elmlər Akademiyasının prezidenti, akademik İsa Həbibbəyli, rəyçiləri filologiya üzrə fəlsəfə doktoru, “Ədəbiyyat qəzeti”nin baş redaktoru Azər Turan və filologiya üzrə fəlsəfə doktoru Aygün Bağırlıdır.

Nizami Gəncəvi adına Ədəbiyyat İnstitutunun İctimaiyyətlə əlaqələr şöbəsindən Gülnar Səma ZiM.Az-a bildirib ki, kitabda çağdaş humanitar fikrinin kontekstində Azərbaycan uşaq ədəbiyyatının tarixi təcrübəsi – təşəkkülü, yaranması və inkişafı ümumiləşdirilir. “Uşaq ədəbiyyatı: tarixdən çağdaşlığa”, “Klassika modern işığında”, “Uşaq mətnləri diskurs kimi”, “Uşaq ədəbiyyatında müharibə və zəfər duyğuları”, “Dərsliklərin vəziyyəti: problemlər, qayğılar”, “Müsahibələr: analitik müstəvidə”, “Müzakirə saatı: söhbətlər, düşüncələr”, “Uşaq ədəbiyyatında imzalar” adlı bölmələrdə sistemləşdirilən mətnlərdə uşaq ədəbiyyatının müasir istiqamətləri ilə bağlı dəyərləndirmə aparılır, müxtəlif uşaq ədəbiyyatı nümunələrinin poetikası, üslub və növ zənginliyi nəzəri analizə cəlb olunur, habelə Zəfər tariximizdən sonra uşaq ədəbiyyatının vardığı yeni hüdudlar tədqiqat predmetinə çevrilir.

Kitab humanitar fikir adamlarına, elm, ədəbiyyat və geniş oxucu auditoriyalarına ünvanlanıb.

Qeyd edək ki, filologiya elmləri doktoru, dosent Elnarə Akimova AMEA Nizami Gəncəvi adına Ədəbiyyat İnstitutunda "Uşaq ədəbiyyatı" şöbəsinin, "Ədəbiyyat qəzeti"ndə ədəbiyyatşünaslıq şöbəsinin müdiridir. "Azərbaycan ədəbi tənqidi müstəqillik illərində" (2009), "Yeni təfəkkür və ədəbi tənqid" (2013), "Çingiz Aytmatov - türk ruhunun qələbəsi" (2013), "Çağdaş poeziya və ədəbi təmayüllər" (2016), "Bəxtiyaram Man" (Baxtiyar Vahabzadə haqqında. 2016), "Müslüm Maqomayev" (2018), "Düşüncə zamanı ədəbi tənqid diskurs kimi" (2019), "Müstəqilliyin ədəbiyyatı müzakirə diskursunda" (2019), "Uzun, incə bir yolda (Azər Turan ömrü)" (2021) kitabları çap olunub. Eləcə də 6 kitabın həmmüəllifi, 600-ə yaxın elmi və ədəbi-tənqidi məqalənin müəllifidir.
"Azərbaycan Respublikası Mədəniyyət Nazirliyinin "Şans" nominasiyası" (2013), "AMEA Rəyasət heyətinin "Fəxri Fərmanı" (2014), "AMEA Rəyasət heyəti Humanitar Elmlər Bölməsinin "Fəxri Fərmanı" (2015), "AMEA Nizami Gəncəvi adına Ədəbiyyat İnstitutunun "İlin gənc alimi" mükafatı" (2015), "Azərbaycan Yazıçılar Birliyi və "Ədəbiyyat qəzeti"nin "Əli bəy Hüseynzadə mükafatı" (2016), "Azərbaycan Yaradıcılıq Fondunun "Ədəbiyyat adamı" mükafatı" (2018), "APA Holding "Kulis.az" saytı"nın "İlin tənqidçisi" mükafatı (2019), "AMEA Nizami Gəncəvi adına Ədəbiyyat İnstitutunun "Fəxri Fərmanı" (2019), "AMEA-nın Rəyasət Heyətinin "Fəxri Fərmanı" (2021), "Azərbaycan Respublikası Mədəniyyət Nazirliyinin "Nizami Gəncəvi" döş nişanı" (2021) və AMEA Nizami Gəncəvi adına Ədəbiyyat İnstitutunun "Yaşar Qarayev" mükafatına (2024) layiq görülmüşdür.
27 mart 2024-cü ildə Azərbaycan Respublikası Prezidenti İlham Əliyevin sərəncamı ilə elmi və ictimai-siyasi sahədə səmərəli fəaliyyətinə görə "Heydər Əliyevin 100 illiyi (1923-2023) yubiley medalı" ilə təltif olunmuşdur.

Biz də redaksiya heyətimiz adından, dəyərli alimimiz, çox hörmətli millət vəkilimiz, filologiya elmləri doktoru, dosent Elnarə xanım Akimovanı yeni kitabının işıqüzü görməsi münasibəti ilə ürəkdən təbrik edir və ona şərəfli fəaliyyətində yeni-yeni uğurlar arzulayırıq!..

Müşfiq BORÇALI,
ZiM.Az


.