AzTU-nun rektoru Müdafiə Sənayesi Naziri ilə görüşüb

2020-ci il yanvarın 29-da Müdafiə Sənayesi Nazirliyində Azərbaycan Texniki Universitetinin (AzTU) kollektivi ilə görüş keçirilib.

Müdafiə Sənayesi naziri
Mədət Quliyev
Azərbaycan Texniki Universitetinin rektoru professor Vilayət Vəliyevi, Xüsusi Texnika və Texnologiyalar fakültəsinin dekanı dosent Elçin Rzayevi və Xüsusi Texnika kafedrasının müdiri, professor Ələkbər Hüseynovu qəbul edib.

Görüşün məqsədi Texniki Universitetdə yeni süni intellekt və robotlaşdırma ixtisasının yaradılması, tələbələrin təcrübə qazanmalarına şərait yaradılması və könüllülər qismində müəssisələrin iş prosesinə cəlb olunmalarının müzakirəsi olub.

Prezident İlham Əliyevin Sərəncamı ilə 2020-ci ilin Azərbaycanda “Könüllülər ili” elan olunduğunu qeyd edən Mədət Quliyev Texniki Universitetin tələbələrinin də könüllülər qismində müəssisələrə cəlb edilmələri, oradakı iş prossesi ilə yaxından tanış olmaları və ən əsası isə könüllülük prinsipi çərçivəsində təcrübəyə yiyələndikdən sonra gələcəkdə öz iş fəaliyyətlərinə bu müəssisələrdə davam etmələri təklifini irəli sürmüşdür.

Nazir tələbələrin öz ixtisasları üzrə təcrübə qazanmaları və gələcəkdə işlə təmin olunmaları üçün rəhbərlik etdiyi qurumda lazımi şərait yaratmağa hazır olduğunu diqqətə çatdırıb.

Görüşdə Müdafiə Sənayesi Nazirliyinin təşəbbüsü ilə müəssisələrdə Xüsusi Texnika kafedrasının nümayəndəliyinin açılması və tələbələrin nəzəri biliklərinin təcrübə ilə əlaqələndirilməsinə şərait yaradılması məsələsi müzakirə olunub.
Görüş qarşılıqlı fikir mübadiləsi ilə davam etdirilib.

ZiM.Az


.