Azərbaycan Respublikasının Təhsil naziri

Mikayıl Çingiz oğlu Cabbarov

Azərbaycan Respublikasının təhsil naziri
(2013-cü ildən),

Azərbaycan Respublikası Nazirlər Kabineti yanında "İçərişəhər" Dövlət Tarix-Memarlıq Qoruğu
İdarəsinin rəisi (2009-2013),

Azərbaycan Respublikası iqtisadi inkişaf
nazirinin müavini (2004-2009),

Azərbaycan Badminton Federasiyasının prezidenti
(2015-ci ildən)

Mikayil Çingiz oğlu Cabbarov - 1976-cı il sentyabrın 19-da Bakıda anadan olmuşdur.

1992-ci ildə Bakı Dövlət Universitetinin beynəlxalq hüquq fakültəsinə daxil olmuş, 1997-ci ildə həmin fakültəni fərqlənmə diplomu ilə bitirmişdir.

1997-1998-ci illərdə ABŞ-ın Kaliforniya ştatının Sakramento şəhərindəki Pasifik Universitetinin Macgeorge hüquq məktəbində hüquq, 2004-cü ildə isə Azərbaycan Dövlət İqtisad Universitetində iqtisadiyyat üzrə
magistr dərəcələri almışdır.

1999-cu ildən ABŞ-ın Nyu-York ştatında Vəkillər Kollegiyasının (New York State Bar Association) üzvüdür.

Əmək fəaliyyətinə 1995-ci ildən bank sektorunda başlamış, 1999-2002-ci illərdə hüquq şirkəti və özəl sektorda hüquqşünas kimi fəaliyyət göstərmişdir.

2002-2003-cü illərdə İqtisadi İnkişaf Nazirliyində nazir müşaviri, 2003-2004-cü illərdə Azərbaycanda İxracın və İnvestisiyaların Təşviqi Fondunun (AZPROMO) prezidenti vəzifələrində çalışmışdır.

Azərbaycan Respublikası Prezidentinin 2004-cü il 20 fevral tarixli Sərəncamı ilə İqtisadi inkişaf nazirinin müavini vəzifəsinə təyin edilmişdir. Həmin vəzifədə işlədiyi dövrdə beynəlxalq maliyyə qurumları ilə əməkdaşlıq, xarici iqtisadi əlaqələr, xarici investisiya siyasəti, beynəlxalq arbitrajlarda hüquqi məsələləri və korporativ idarəetmə kimi fəaliyyətlərin əlaqələndirilməsini həyata keçirmişdir.

Azərbaycan Respublikası Prezidentinin 2009-cu il 6 mart tarixli Sərəncamı ilə Nazirlər Kabineti yanında "İçərişəhər" Dövlət Tarix-Memarlıq Qoruğu İdarəsinin rəisi vəzifəsinə təyin edilmişdir.

Azərbaycan Respublikası Prezidentinin 2013-cü il 19 aprel tarixli Sərəncamı ilə Azərbaycan Respublikasının təhsil naziri təyin edilmişdir.

Mikayıl Cabbarov respublikamızın ictimai həyatında da fəal rol oynayır.

1996-1997-ci illərdə Azərbaycan Gənclər Təşkilatları Forumunun sədr müavini seçilmişdir.
"Nə? Harada? Nə vaxt?" və "Breyn-Rinq" oyunlarının fəal üzvü olmuşdur.
1994-1997-ci illərdə "Atəşgah" Bakı Bilicilər (İntellektual Oyunlar) Klubunun prezidenti olmuşdur.

"Breyn-Rinq" oyunlarının 1996-1997-ci illər üzrə mütləq MDB çempionu adını qazanmışdır.
1997-ci ildə Moskvada təşkil edilən və Rusiyanın 1-ci kanalında yayımlanan "Nə? Harada? Nə zaman?" oyununun yay seriyasında iştirak edən ilk azərbaycanlı bilici olmuşdur.

"Nə? Harada? Nə zaman?" Bakı Televiziya Klubunun təcrübəli üzvüdür.

Beşillik oyunların qalibidir.

2002-ci ildə "Breyn-Rinq" üzrə dünya və "Nə? Harada? Nə zaman?" oyunu üzrə Azərbaycan çempionu olmuşdur.

Evlidir, 2 övladı var.

Mikayıl Cabbarov 2009-cu ildən Gürcüstanın Tbilisi şəhərinin Fəxri Vətəndaşıdır.

Biz də Azərbaycan Respublikasının təhsil naziri, çox hörmətli Mikayıl Cabbarova
şərəfli fəaliyyətində yeni-yeni uğurlar arzulayırıq!..

P.S.:

Azərbaycan Respublikası Prezidentinin 05 dekabr 2017-ci il tarixli sərəncamı ilə Azərbaycan Respublikası Vergilər naziri təyin olunub.


.