Polkovnik VAQİF BAYRAMOV (1959)

TƏBRİK EDİRİK!..

Dekabrın 21-i
dəyərli dostumuz,
çox hörmətli soydaşımız,
əziz və sevimli qardaşımız,
polkovnik
Vaqif Bayramovun
doğum günüdür.
Daha doğrusu, Yubileyidir!..
Anadan olmasının
65 illik yubileyi!..

Yubileyiniz mübarək,
əziz və dəyərli
Vaqif müəllim!...


Vaqif Müsəlli oğlu Bayramov -
1959-cu il dekabrın 21-də
qədim Borçalı mahalında -
indiki Gürcüstan Respublikasının
Bolnisi rayonundakı Darvaz kəndində
anadan olub.

O, Darvaz kənd orta məktəbini (1966-1976), Azərbaycan Dövlət Politexnik İnstitutunun (indiki AzTU-nun) metallurgiya fakültəsini (1977-1982), Rusiya Federasiyasının Ulyanovsk şəhərindəki Ali Hərbi Mexaniki Məktəbin Yanacaq və Sürtgü materialları üzrə ixtisasartırma fakültəsini fərqlənmə diplomu ilə bitirib.(1989).

1982-ci ildən keçmiş Sovet ordusunda hərbi xidmətə başlayıb, müxtəlif vəzifələrdə xidmət edib.

1989-1992-ci illərdə N saylı hərbi hissədə Yanacaq və sürtgü materialları xidmət rəisi vəzifəsində çalışıb.

Vaqif Bayramov Azərbaycanda Milli Ordu yarananda öz kömək əlini uzadıb, ilk olaraq Milli Orduya yazılanlardan olub. Azərbaycan Respublikası Müdafiə Nazirliyində Yanacaq və Sürtgü Materialları şö'bəsinin yaradıcılarından olub. 1992-ci ildə həmin şöbənin rəis müavini, 6 ay sonra 32 yaşında həmin şöbənin rəisi - polkovnik vəzifəsinə təyin olunub.

Mayor Vaqif Bayramov 1994-cü ildə nazirliyin ən gənc şöbə rəisi kimi vaxtından əvvəl polkovnik-leytenant rütbəsinə layiq görülüb.

Polkovnik-leytenant V.M.Bayramov 1995-1999-cu illərdə Hava Hücumundan Müdafiə və Hava hücumu qoşunları hərbi hissələrində komandirin Arxa cəbhə üzrə müavini, Arxa cəbhə rəisi kimi mə'sul vəzifələrdə xidmət edib.

Polkovnik V.M.Bayramov 1999-cu ildən təqaüdə çıxana kimi Hava Hücumundan Müdafiə və Hərbi Hava Qoşunlarının Maddi-texniki tə'minat aparatının təşkilatçı-planlaşdırma bölməsinin rəisi - Maddi-texniki tə'minat rəisinin müavini vəzifəsində xidmətini şərəflə davam etdirib.

O, hərbi xidməti ilə əlaqədar bir neçə medal və fəxri fərmanla təltif olunmuşdur.

Qarabağ Müharibəsi veteranı olan polkovnik Vaqif Bayramov hazırda təqaüddədir.

Polkovnik Vaqif Bayramov həm də gözəl ailə başçısıdır.
Ömür-gün yoldaşı - hərbi kitabxananın müdiri vəzifəsində çalışan Təranə xanımla birlikdə 3 övlad - bir qız, iki oğul böyüdüb boya-başa çatdırıb.
Üçü də ali təhsilli və evlidirlərdir. Qızı Aynur - kapitan rütbəsində hərbi həkimdir. Oğlu Elnur hüquqşünasdır, Ədliyyə mayorudur. Kiçik oğlu Anar isə iqtisadçıdır.


Biz də fürsətdən istifadə edib,
hələ ki 9 nəvənin sevimli babası olan
polkovnik Vaqif Bayramovu
anadan olmasının 65 illik yubileyi münasibətilə
ürəkdən təbrik edirik,
ona uzun ömür, möhkəm çansağlığı,
ailə səadəti, nəvə-nəticə toyu görməyi
arzulayırıq!..

Müşfiq BORÇALI,
ZiM.Az



(Bax: BORÇALI ENSİKLOPEDİYASI. III cild. Borçalı Ulduzları. Bakı, "Azərbaycan" nəşriyyatı, 2001, səh.87-88.)




.