Mayor HACISƏYYAD ƏLİYEV (1930-1995)

ALLAH RƏHMƏT ELƏSİN...

HACISƏYYAD İSMAYIL OĞLU ƏLİYEV
polis-işçisi, mayor
(1930-1995)

Hacısəyyad İsmayıl oğlu Əliyev - 1930-cu ildə qədim Borçalı mahalının - Lüksemburq (indiki Gürcüstan Respublikasının Bolnisi) rayonundakı Darvaz kəndində qulluqçu ailəsində anadan olumuşdur.
O, 1947-ci ildə Darvaz kənd orta məktəbini, 1950-ci ildə Marneuli Pedaqoji Texnikumunu, 1956-cı ildə keçmiş SSRİ Daxili İşlər Nazirliyinin Saratov Milis məktəbini, 1968-ci ildə Orcankidze şəhərində Ümumittifaq Hüquq Qiyabi İnstitutunu bitirmişdir.

Hacısəyyad Əliyev 1958-ci ildə doğma kəndindəki Darvaz orta məktəbində müəllim kimi pedaqoji fəaliyyətə başlamış və 1956-cı ilin oktyabr ayına qədər müəllim işləmişdir.
Sonra Daxili İşlər Nazirliyinin məktəbində təhsil almış və təqaüdə çıxana qədər milis orqanlarında müxtəlif vəziələrdə şərəflə işləmişdir.
O, 1956-1960-cı illərdə Bolnisi Rayonu Daxili İşlər Şöbəsində sahə müvəkkili, 1960-1962-ci illərdə həmin şöbədə Sosialist mülkiyyətinin dağıdılmasına qarşı mübarizə üzrə səlahiyyətli müvəkkil, 1962-1965-ci illərdə həmin şöbədə rayon əməliyyat idarəsində baş səlahiyyətli müvəkkil, 1965-1967-ci illərdə Zalqa rayonu Daxili İşlər Şöbəsində Sosialist mülkiyyətinin dağıdılmasına qarşı mübarizə üzrə səlahiyyətli müvəkkil, 1967-1970-ci illərdə Bolnisi rayonu Daxili İşlər Şöbəsində baş müstəntiq, 1970-1973-cü illərdə Dmanisi (keçmiş Başkeçid) rayonu Daxili İşlər Şöbəsində müstəntiq, 1973-1975-ci illərdə Əməliyyat İdarəsinin baş təlimatçısı, 1975-1977-ci illərdə Gürcüstan SSR Daxili İşlər Nazirliyinin əmək-islah idərisində növbətçi-rəis müavini, 1977-1981-ci illərdə Marneuli rayonu Daxili İşlər şöbəsində azyaşlılar üzrə sahə təlimatçısı, 1981-1982-ci illərdə həmin şöbədə baş sahə təlimaçısı, 1982-1985-ci illərdə həmin şöbədə baş sahə müvəkkili vəzifələrində şərəflə xidmət etmiş-dir.
O, milis orqanlarında şərəfli xidmətlərinə görə “Daxili İşlər Nazirliyinin orqanlarında qüsursuz xidmətlərinə görə” medalının hər üç dərəcəsi, “Sovet milisinin 50 İlliyi”və “Əmək veteranı” medalıyla, bir çox Fəxri fərmanlar və təşəkkürlərlə təltif olunmuşdur.

Hacısəyyad Əliyev 1985-ci ildən təqaüdə çıxmış, 1990-cı ilən sonra Bakı şəhərində yaşamışdır. O, gənc yaşlarından bədii yaradıcılıqla da məşqul olmuşdur. Bir sıra mətbuat orqanlarında və ədəbi toplularda şeirləri çap olunmuşdur.

Hacısəyyad Əliyev 1995-ci ildə isə Bakı şəhərində vəfat et-mişdir. Allah rəhmət eləsin!

Müşfiq BORÇALI,
ZiM.Az


.