“Kitabi-Dədə Qorqud” Pakistanda urdu dilində çapa hazırlanır

AMEA Nizami Gəncəvi adına Ədəbiyyat İnstitutu ilə Pakistan Ədəbiyyat Akademiyası arasında qarşılıqlı əməkdaşlıq əlaqələri konkret layihələr üzrə uğurla davam etdirilir.

Pakistan Ədəbiyyat Akademiyasının Prezidenti, professor Yusif Huşkun bu ilin iyul ayında Azərbaycana səfəri çərçivəsində AMEA-nın vitse-prezidenti, Ədəbiyyat İnstitutunun baş direktoru, akademik İsa Həbibbəyli ilə aparılan danışıqlar zamanı Azərbaycan xalqının ədəbi-mədəni pasportu olan “Kitabi-Dədə Qorqud” eposunun Pakistanda urdu dilində nəşr edilməsi qərara alınıb.

Nizami Gəncəvi adına Ədəbiyyat İnstitutunun İctimaiyyətlə əlaqələr şöbəsinin müdiri Gülnar Səma ZiM.Az-a bildirib ki, “Kitabi-Dədə Qorqud”un urdu dilində nəşri Pakistan Ədəbiyyat Akademiyasının Prezidenti, professor Yusif Huşkun ön sözü ilə açılacaq.
Eposun urdu dilində nəşri üçün AMEA-nın vitse-prezidenti, akademik İsa Həbibbəyli “Azərbaycan xalqının Ata kitabı” adlı geniş məqalə yazıb.
“Kitabi-Dədə Qorqud” eposu urdu dilinə Pakistan Ədəbiyyat Akademiyasının əməkdaşları tərəfindən tərcümə olunub.
Eposun bu ilin oktyabr ayında Azərbaycanda dövlət müstəqilliyinin bərpası gününə qədər İslamabadda çapdan çıxması nəzərdə tutulur.
Məlumat üçün bildiririk ki, “Kitabi-Dədə Qorqud” eposu 2021-ci ildə akademik İsa Həbibbəylinin geniş müqəddiməsi ilə İtalyanın “Sondro Tevi” nəşriyyatı tərəfindən nəşr olunmuşdur.

ZiM.Az

.