Eltun Mehdioglu: ÇOXDU BORÇALIDA SƏFALI YERLƏR

ÇOXDU BORÇALIDA SƏFALI YERLƏR

Çoxdu Borçalıda səfalı yerlər,
İstər aran olsun, istər dağ olsun.
Arzumdu hər zaman ulu torpağım
Yaşıl meşə olsun, güllü bağ olsun.

Çıx Bolnis, Başkeçid zirvələrinə,
Yayın qızmarında daha sərinə,
Yığışaq dostların həndəvərinə,
Saz olsun, söz olsun, şam-çıraq olsun.

Qarayazı yurdun gözəl guşəsi,
Yam yaşıl çölləri, birdə meşəsi,
Yayılıb hər yanda Zahidin səsi,
Kim görmək istəsə bir qonağ olsun.

Qaraçöp Elinə olsun salamlar,
Qoçaqdı, igiddi burda adamlar,
Çıxarmı yadımdan gözəl məqamlar,
Yaxşı dostlarımın canı sağ olsun,

Dağların qoynunda yerləşir Qabal,
Camaat dolanır özü üçün halal,
İldə bircə dəfə gedib qonaq qal,
İç pürrəng çayından günün ağ olsun.

Kürüstü bir aləm Kür qırağında,
Hər cür meyvəsi var bağça bağında,
Buyur gəl həyatın şirin çağında,
Ömrünə gününə xoş marağ olsun.

Gəldim Gorarxıya çatdım nəhayət,
Burdadır ən ülvi ən saf məhəbbət,
Yuanalı bulağı bizlərə zi'nət,
Düşmanın ürəyinə böyük dağ olsun.

Eltun sözlərini insanlar qana,
Bu yerdə çatmısan şöhrətə şana,
Ürəyi istəyən gəlsin Sarvan'a,
Qüssədən, kədərdən, hey uzağ olsun.


BAŞKEÇİDİN DAĞLARI

Dost tanışla, qarış-qarış gəzmişik,
Olub mehman Başkeçidin dağları.
Bir gün yenə dönəcəyəm mən, sənə
Könül açan Başkeçidin dağları.

Uca dağlar burda verib baş-başa,
Hər tərəfi, gül-çiçəkli tamaşa,
Gəlib burda ömrü-günü xoş yaşa,
Cənnət məkan Başkeçidin dağları.

Çəmənliklər, buz bulaqlar, burdadı,
Qış gələndə zirvələrin qardadı,
Qazanmısan, əbədiyyən yurd adı,
Dərdə dərman Başkeçidin dağları.

Mehdioğlu gəlib oldu qonağın,
Hər tərəfdən gəlir səsin sorağın,
İgidlərdi, ərənlərdi dayağın,
A gülüstan Başkeçidin dağları.


‪BƏLKƏ GƏLDİM‬... ‪‎BƏLKƏ GƏLƏ BİLMƏDİM‬...

Yaman tutub yollarımı duman-çən,
Bəlkə gəldim... bəlkə gələ bilmədim...
Keçirmədim ömrü-günü burda şən,
Bircə kərə sevinmədim, gülmədim.
Bəlkə gəldim...Bəlkə gələ bilmədim...

Soruşmurlar, tanışlarım halımı,
Fələk qırıb qanadımı, qolumu,
Qohumlarım gözləyirlər yolumu,
Mən onları ürəyimdən silmədim.
Bəlkə gəldim...Bəlkə gələ bilmədim...

Cavan könlüm getdi mənim badıma,
Kül eylədim, atəşimə oduma,
Bu yerlərdə çatan yoxdu dadıma,
Qismət olsa bəlkə burda ölmədim.
Bəlkə gəldim...Bəlkə gələ bilmədim...

Torpağımdan,öz yurdumdan, nigaran,
Qürbət eldə ömür sürdüm yarı can,
Qohumlarım eylədilər, toy-nişan,
Nələr oldu, nələr keçdi,görmədim.
İnnən belə bəlkə daha gəlmədim...
Bəlkə gəldim...Bəlkə gələ bilmədim...


***BORÇALI SAYAĞI DEYİŞMƏ***

Aişə Səyyadqızı & Eltun Mehdioğlu

Aişə Səyyadqızı
Allahın payıdı istedadınız,
Bilinki,hər zaman sınayacaqlar.
Allahın işinə qarışanları,
Göydə mələklərdə qınayacaqlar.

Eltun Mehdioğlu:
Allahın payıdı, söz istedadım,
Zövq alar sözümdən, əzizim, yadım,
Ulu Borçalıdı ünvanım, adım,
Hər eldə, mahalda tanıyacaqlar.

Aişə Səyyadqızı:
Ay Allah ömrümüz olmasın hədər,
Kimidə sevinc var,kimidə kədər.
Pislər ar eyləməz bir zərrə qədər,
Yaxşılar mənliyin qoruyacaqlar.

Eltun Mehdioğlu:
Yalanla, kələklə dostdan olanlar,
Ömrü uralanmış bostan olanlar!
Tarixə yazılır, dastan olanlar,
Qeyrət tək qorunur başda papaqlar.

Aişə Səyyadqızı:
Bu dünya nə qədər yandırıb-yaxsa,
Yenədə deyərəm,dediyim haqsa.
Ay Aişə,darıxma bəlkə nə vaxtsa
Şeirini,sözünü arayacaqlar.

Eltun Mehdioğlu:
Alını açıq edər doğrular düzlər,
Ay Eltun, qəm kədər görməyə üzlər,
Sən köçüb getsəndə, yazdığın sözlər,
Bəlkə səndən sora yaşayacaqlar.