RUHUN ŞAD OLSUN, VİLAYƏT RÜSTƏMZADƏ!..

Rüstəmzadə Vilayət Məhəmməd oğlu — tanınmış şair, tərcüməçi, ədəbiyyatşünas. Azərbaycan Yazıçılar Birliyinin üzvü (1968).

1937-ci il avqustun 12-də qədim Borçalı mahalında, indiki Gürcüstanın Bolnisi rayonundakı Bala Muğanlı kəndində anadan olmuşdur.

1957-ci ildə Marneuli Dövlət Pedaqoji Məktəbini, 1964-cü ildə Moskvada M.Qorki adına Ədəbiyyat İnstitutunu bitirmişdir.

İlk mətbu şeiri - "Tut kötüyü" 1956-cı ildə Marneulidə - "Stalin yolu" qəzetində çap olunmuşdur.

Əmək fəaliyyətinə "Azərnəşr"də tərcüməçi-redaktor kimi başlamışdır.

1968-1971-ci illərdə M.V.Lomonosov adına Moskva Dövlət Universitetinin aspirantı olmuşdur.

Bir müddət Azərbaycan Mədəniyyət Nazirliyinin aparatında çalışmış, daha sonra pedaqoji fəaliyyətlə məşğul olmuş, M.F.Axundov adına Pedaqoji Rus dili və Ədəbiyyatı İnstitutunda (indiki Bakı Slavyan Universiteti), Azərbaycan Dövlət Universitetində (indiki BDU) SSRİ xalqları ədəbiyyatını tədris etmişdir.

"Azərbaycan" jurnalında tənqid və ədəbiyyatşünaslıq şöbəsinin müdiri, "Yazıçı" nəşriyyatında bədii tərcümə redaksiyasının müdiri(1974-1980), "Azərnəşr"də böyük redaktor (1983-1989), Azərbaycanın Xarici Ölkələrlə Dostluq və Mədəni Əlaqələr Cəmiyyətinin orqanı (yeddi dildə nəşr edilən) "Sovet Azərbaycanı" qəzetinin baş redaktoru, "Azərnəşr"də böyük redaktor, Azərbaycan Tərcümə və Mədəni Əlaqələr Mərkəzinin məsul katibi, "Türk dünyası" jurnalının baş redaktorunun birinci müavini, "Amal" qəzetinin baş redaktorunun birinci müavini vəzifələrində çalışmışdır.

Vilayət Rüstəmzadə rus poeziyasından və nəsrindən bir çox nümunələri, o cümlədən N.Nekrasovun “Rus qadınları”, A. Blokun “Lay-lay” əsərlərini və Yuqoslaviya hekayələrini, R.Həmzətovun “Mənim Dağıstanım” kitabını, Rəmz Babacanın "Dirilik suyu" poemasını Azərbaycan dilinə, H.Cavidin “Ana” və “Uçurum” pyeslərini rus dilinə çevirib. O, “Oxu, bülbülüm” (1996), “Qəlbimin gözü ilə” (1979), “Ağlama məhəbbətim” (1989) poetik toplularının müəllifidir.

Vilayət Rüstəmzadə SSRİ xalq artisti İsmayıl Dağıstanlının kürəkəni idi.

Alllah rəhmət eləsin!... Ruhun şad olsun, Vilayət Rüstəmzadə!..

Müşfiq BORÇALI,
ZiM.Az


.