Elida Muxayeva: Qadın olmaq üçün bir gün...

Hər martın 8-i qeyd olunan “Beynəlxalq qadınlar günü” yer üzündəki qadın cinsinə mənsub olan məfhumlara qarşı sevgi, nəzakət, məhəbbət tərənnümüdür. Dünyanın əksər ölkələri 8 martı “Qadınlar günü” kimi tanıyıb bayram edir.
Qadınların ilk mübarizəsi 1857-ci ilin 8 martında başladı. Fasilələrlə davam etdi bu mübarizə. Sonralar Klara Setkin adlı bir alman qadın Amerikada yandırılaraq öldürülən 129 qadının xatirəsinə 8 martın “Beynəlxalq qadınlar günü” olmasını təklif etdi. Təklif qəbul olundu və o vaxtdan bu vaxta 8 mart qadınların özlərini xoşbəxt, məğrur və qadın olduqlarına əmin olduqları yeganə gün kimi tarixə düşdü.
8 mart “Beynəlxalq qadınlar günü” ilk dəfə Romada bayram kimi qeyd olundu.
Artıq 8 mart Respublika səviyyəsində təntənəli şəkildə qeyd olunur.
Çöldə bayram, evdə isə.......
Qadın tanrının kişiyə əmanətidir. Allah əvvəlcə Adəmi, sonra Həvvanı yaradaraq onu Adəmə əmanət etdi.
Qadın zərif, incə, incə olduğu qədər də güclü, dözümlü, mübariz məxluqdur. Qadın hər gün sevilmək, sevmək, qayğı, hörmət gözləyir, bir gün deyil! Qadın hər gün qadın olmaq istəyir. Özünü hər an qadın hiss etmək istəyir. Məgər qadın çox şey arzulayır!?
Qadına ən böyük hədiyyə ona edilən hörmət, verilən dəyərdir. Bu dəyəri bir dəstə güllə, bir qutu ətirlə, və ya hansısa qızıl əşya ilə ölçməyin, əks cinslər!
Bir gün, yalnız və yalnız bir gün evlərində qadın olduğunu xatırlayan kişilər. O gün evindəki o canlıya insan kimi, şüurlu məxluq kimi, qadın kimi davranır. Elə o gün bəlkə də bir dəstə çiçək, və ya bir qutu ətirlə həmin o canlıya da qadın olduğunu xatırladır. Lakin qadın özünü mənən qadın hiss etməlidir. Hansısa kiçik bir hədiyyənin qarşılığında deyil.
İlin 364 günü mətbəxdə çömçə, yağlı qazanlar tutan o canlı bir gün əlində gül, ya da başqa bir hədiyyə tutur. İlin 364 gününü qul, bir gününümü qadın olur bu canlı!?
Bəzi kişilər isə bu bircə günü belə çox görür evində saxlayıb əşyadan fərqləndirmədiyi, heyvandan artıq dəyər vermədiyi qadınına. Nə bayram, nə də “qadınlar günü”. Qadının da günümü olar!? “Qadının günü mətbəx və ev işləridir” fikrini əlində bayraq tutub, kalendarda qırmızı dairədə verilən 8 rəqəmindəki qırmızını görməzdən gəlir. “Qadın nökərdir, quldur” fikrinə əsaslanaraq, nökərin bayram etməsinin, nökərə ailə üzvü kimi davranılmağın yasaq olduğunu düşünür. Bu tək öz qadınına olan münasibətdə deyil, anasına olan münasibətdə, və ya qadın cinsinə mənsub olduğu üçün hər gün lənətlənən qız övladına olan münasibətdə də özünü göstərir. Ona həyat bəxş edən, 9 ay bətnində, sonra qollarında, qəlbində gəzdirən ana – o qadın da bir gözəl sözə, bir öpüşə, bir dəstə çiçəyə layiq görülmür. Qız övladı olduğu üçün atası tərəfindən əzizlənməyən, sevilməyən övlad, bayram günü də bir nəvazişə qayğıya möhtac qalır. Bəli, bu günü qəbul etməyən kişilər, və ya qəbul edib bircə gün evindəki qadınlara qadın kimi, canlı kimi davranan, 9 mart səhər saatlarından etibarən həyatına və yaşam tərzinə eyni yerdən və olduğu kimi davam edən kişilər var və bizim cəmiyyətimizdə mövcuddurlar. Əsl qadın olmaq üçün və səninlə hər gün qadın kimi davranılmaq üçün əks cinsin həmcinsinə istehza ilə “arvadsanmı?” deyib, düşüncəsində canlandırdığı o arvad kimi olmamaq lazım. Qadın olsaq da biz də canlıyıq, biz də insanıq. Qadın da düşünə bilir, sevinə, kədərlənə, hirslənə bilir.
Deməli qadın olmaq üçün kişilərin düşündükləri, xəyallarında canlandırdıqları gücsüz, qorxaq “arvad” olmaq gərəkmir.
Biz qadın olaraq güclü, məğrur olsaq, onlar bizi “arvad” kimi görməzlər, rişxəndlə deyib, xəyallarında canlandırdıqları “arvad” obrazını bu halda özləri oynamaq məcburiyyətində qalarlar. Güclü qadına söz deyə bilməyən kişiciklər məhz həmin zərif, zərif olduğu qədər də aslan olan qadının arxasınca arvad obrazını canlandırarlar. Əziz qadınlar, gəlin bir gün deyil, hər günümüzü bayram kimi yaşayaq! Bəşəriyyətdəki bütün qadınların gülüb, sevinib bayram etməsi arzusu ilə bayramımız mübarək!