SDU-da Magistrantların XVI Respublika Elmi Konfransı keçirilib

Hər il olduğu kimi bu il də Sumqayıt Dövlət Universitetində Ümummilli Lider Heydər Əliyevin anadan olmasının 93-cü ildönümünə həsr olunmuş magistrantların XVI Respublika Elmi Konfransı keçirilib.

SDU-nun mətbuat xidmətinin rəhbəri Nazxanım Cəlilli Zim.Az -a bildirib ki, konfransı giriş sözü ilə rektor professor Elxan Hüseynov açaraq konfrans iştirakçılarını salamlaıyıb və bir çox ali məktəblərin prorektorlarını, Doktorantura və magistratura şöbəsinin müdirlərini universitetimizdə görməkdən məmnunluğunu ifadə edib.

Rektor Elxan Hüseynov Magistrantların XVI Respublika Elmi Konfransının əlamətdar bir günə - Azərbaycan xalqının Ümummilli Lideri Heydər Əliyevin anadan olmasının 93-cü ildönümünə həsr olunduğunu bildirərək onun Azərbaycan xalqı qarşısında xidmətlərindən, dövlətçiliyimizin möhkəmləndirilməsi istiqamətindəki əvəzsiz rolundan danışıb. Qeyd edib ki, Dahi liderin həyata keçirdiyi siyasət, düşünülmüş strategiya Azərbaycanı bu gün dünyanın ən sürətlə inkişaf edən ölkələrindən birinə çevirmişdir. Azərbaycanda birinci, istərsə də ikinci rəhbərliyi dövründə Heydər Əliyev daim elmə, təhsilə xüsusi önəm verirdi. 1993-cü ildə xalqın təkidli tələbi ilə yenidən ölkəyə rəhbərlik edən Ümummilli Lider təhsilin inkişafını, müasir təfəkkürlü, düşüncəli, hərtərəfli biliyə malik savadlı gənclərin yetişdirilməsini prioritet vəzifə kimi qarşıya qoydu. Elmə və təhsilə böyük önəm verilməsi, bir-birinin ardınca yeni proqram və layihələrin, təhsil islahatlarının həyata keçirilməsi ölkənin elmi, mədəni və sosial-iqtisadi həyatında böyük dönüş yaratdı. Danılmaz faktdır ki, Ulu Öndər Heydər Əliyevin təhsil siyasəti konsepsiyasına əsasən ali məktəblərimizdə, o cümlədən Sumqayıt Dövlət Universitetində təhsil alan gənclərin elmi-tədqiqat işlərinə cəlb olunması üçün, bütün lazımi şərait yaradılmışdır.

Rektor onu da vurğulayıb ki, tələbələrimiz müxtəlif ölkələrdə Respublika və Beynəlxalq konfranslarda yaradıcı ezamiyyətlərdə olur, Azərbaycan elmini yüksək səviyyədə təmsil edirlər. Bu gün Təhsil Naziri cənab Mikayıl Cabbarov ölkəmizdə ali təhsilin inkişafı istiqamətində mühüm işlər görür, elm və təhsilin inteqrasiyasına nail olmaq, ali təhsil müəssisələrində aparılan elmi tədqiqatların proritetlərinin müəyyənləşdirilməsi istiqamətində zəruri tədbirlər həyata keçirərək uğurlu layihələrə imza atır. Təhsil Nazirliyinin təşəbbüsü ilə Sumqayıt Dövlət Universiteti hər il magistrantların və gənc tədqiqatçıların respublika elmi konfransına ev sahibliyi etməklə, magistrantlarda elmə, elmi tədqiqatlara olan marağı daha da artırır. Artıq ənənəvi hal alan bu konfransımız da həmin siyasətin tərkib hissəsidir. Bugünki konfransa respublikamızın 17 ali təhsil müəssisəsindən 960 məruzə daxil olmuşdur. İştirakçıların sayının ildən - ilə artması konfransın nə qədər böyük əhəmiyyət kəsb etdiyini bir daha sübut edir.

"Bu gün Ulu Öndərin siyasi kursunu uğurla davam etdirən möhtərəm Prezidentimiz cənab İlham Əliyevin digər sahələrlə yanaşı milli təhsilimizin inkişafı, beynəlxalq aləmə inteqrasiyasını daha da sürətləndirmək istiqamətində həyata keçirdiyi tədbirlər artıq öz bəhrəsini verir. İnanıram ki, Prezident cənab İlham Əliyev tərəfindən uğurla davam etdirilən siyasət Azərbaycan təhsilini daha yüksək zirvələrə qaldıracaq. Əziz gənclər, sevimli magistrantlar sizi bir daha təbrik edir və konfransın işinə uğurlar arzulayıram."

Konfransda cıxış edən Azərbaycan Texniki Universitetinin elmi işlər üzrə prorektoru İlham Pirməmmədov çıxışında qeyd edib ki, belə konfransların keçirilməsi gənc tədqiqatçıların elmi potensialının üzə çıxarılmasında böyük rol oynayır və bu sahədə gənclərin üzərinə çox mühüm vəzifələrin düşür.
Prorektor vurğulayıb ki, elm, təhsil xalqın rifahının yüksəldilməsinə, dövlətimizin gələcək nailiyyətlərinin artmasına xidmət edir, məhz buna görə Sumqayıt Dövlət Universitetinin bu təşəbbüsünü yüksək qiymətləndirir və yaradıcı gənclərə uğurlar diləyirəm.

Odlar Yurdu Universitetinin elmi işlər üzrə prorektoru Tərlan Abdullayev ənənəvi olaraq hər il SDU-da keçirilən konfransı müsbət dəyərləndirib. Heydər Əliyevin gənclər siyasətindən, xalqımızın malik olduğu milli-mənəvi dəyərlər əsasında müstəqillik və dövlətçiliyin qorunması uğrunda mübariz ruhlu gənc nəslin yetişdirilməsində ulu öndərin xidmətlərindən danışıb. Vurğulayıb ki, həyata keçirilən gənclər siyasəti yeni nəslin fiziki, mənəvi-psixoloji sağlam yetişməsinə, istedadlı gənclərin üzə çıxarılması və ölkənin gələcək inkişaf strategiyasının əsasını təşkil edən gəncliyin formalaşmasına töhfə verir.
Prorektor Magistranlara və gənc tədqiqatçılara bir sıra dəyərli tövsiyələr verərək onlara müvəffəqiyyətlər arzulayıb.

Konfransda Doktorantura və magistratura şöbəsinin müdiri dosent Ramiz Hüseynov ənənəvi olaraq keçirilən konfransın əhəmiyyətindən danışıb. Bildirib ki, təqdim ediləcək məruzələr olduqca aktual məsələlərə həsr olunmuşdur. Dosent Ramiz Hüseynov konfransın gedişatı barədə məlumat verərək, diqqətə çatdırıb ki, konfransda mütəşəkkil iştirak edən universitetlərdən Sumqayıt Dövlət Universiteti - 234, Azərbaycan Dövlət İqtisad Universiteti - 208, Azərbaycan Dövlət Pedaqoji Universiteti – 180, Bakı Slavyan Universiteti - 141, Azərbaycan Dövlət Neft və Sənaye Universiteti - 82, Azərbaycan Dövlət Aqrar Universieti - 38 və digər ali təhsil müəssisələrinin magistrantlarının tezisləri bu il də kitab şəklində çap olunaraq iştirakçılara təqdim edilib.

Sonra konfransda Azərbaycan Dövlət İqtisad Universitetinin magistrantı Nərmin Şıxəlizadə, Azərbaycan Dövlət Pedaqoji Universitetinin magistrantı Simuzər Hümbətova, Azərbaycan Dövlət Neft və Sənaye Universitetinin magistrantı Aysel Əliyeva, Bakı Slavyan Universitetinin magistrantı Nərmin Elyasova, Sumqayıt Dövlət Universitetinin magistrantı Rauf Hüseynov çıxış edərək onların tədqiqatçılıq bacarıqlarının inkişaf etdirilməsinə, elmi nailiyyətlərinin müzakirə edilməsinə xidmət edən belə konfransların keçirilməsinin təqdirəlayiq olduğunu söylədilər.

Konfrans öz işini iki gün bölmə iclaslarında davam etdirəcək.
Bölmələr üzrə məruzələr dinləniləcək, fərqlənən tələbələrə konfransın sonunda diplomlar təqdim ediləcək.

Aysel MƏDƏDLİ.



.