Səbinə Ömərova BDU-nun SABAH Mərkəzinin rəhbəri təyin olunub

TƏBRİK EDİRİK!..

Bakı Dövlət Universitetinin (BDU) SABAH Mərkəzinə yeni rəhbər təyin olunub.

Ali təhsil müəssisəsindən "ZiM.Az"a verilən məlumata görə, bu posta biologiya üzrə fəlsəfə doktoru, dosent Səbinə Ömərova gətirilib.

Qeyd edək ki, Səbinə Novruz qızı Ömərova - 1976-cı il noyabrın 10-da Bakı şəhərində anadan olub. 1993-cü ildə Bakı şəhərindəki 46 nömrəli orta məktəbi bitirib.
1997-ci ildə Bakı Dövlət Universitetinin (BDU) Biologiya fakültəsinin bakalavriat səviyyəsini “Biologiya” ixtisası, 1999-cu ildə magistratura səviyyəsini “Biokimya” ixtisaslaşması üzrə fərqlənmə ilə bitirib. 2001-2005-ci illərdə Bakı Dövlət Universitetinin Biologiya fakültəsinin dissertantı olub 2012-ci ildə “Alma meyvələrinin NADP-asılı izositratdehid¬rogenaza-sının öyrənilməsi” möv¬zusunda yazdığı namizədlik dissertasiyasını müvəffəqiyyətlə müdafiə edib. 2013-cü ildə AAK tərəfindən Biologiya üzrə fəlsəfə doktoru elmi dərəcəsinə, 2016-cı ildə isə dosent elmi adına layiq görülüb.

1998-2002-ci illərdə BDU-nun Biologiya fakültəsinin Biokimya və biotexnologiya kafedrasında laborant, 2002-2014-cü illərdə müəllim, 2014-2022-cü illərdə Biologiya fakültəsinin tədris işləri üzrə dekan müavini işləyib. 2016-cı ildən Biofizika və biokimya kafedrasının dosentidir.
Biokimya, Biokimya və molekulyar biologiya, İmmunologiya, Enzimologiya, Endokrinologiya fənlərini tədris edir.

90-dan çox elmi əsərin, 1 dərslik, 3 dərs vəsaitinin müəllifidir. 30-dan çox beynəlxalq elmi konfransda məruzələrinin tezisləri çap olunub.

O, eyni zamanda, “Qida biokimyası” və “Şirəli meyvələrin yetişmə və qocalma proseslərinin biokimyəvi və fizioloji mexanizmlərinin tədqiqi” sahəsində elmi axtarışlarını da davam etdirir.

Səbinə Ömərova “Erasmus Mundus” proqramının layihələri çərçivəsində 2014-cü ildə Fransanın Bolonya şəhərində tədrisin təşkili, 2015-cü ildə İspaniyanın Korunya Universiteti, 2016-cı ildə Çexiyanın Karlova Universitetində tədqiqat metodları, 2016-cı ildə isə Almaniyanın Berlin şəhərində Avropanın aparıcı universitetlərində tədrisin təşkilinə dair təlimlər keçib.

Səbinə Ömərova 2009-cu ildən həm də Dövlət İmtahan Mərkəzinin (DİM) ekspertidir.
2012-ci ildə magistraturaya qəbul proqramlarının təkmilləşdirilməsində, test bankının yaradılmasında və zənginləşdirilməsində xidmətlərinə görə DİM-in Fəxri Fərmanı ilə təltif olunub.

2017-ci ildə Azərbaycan Kütləvi İnformasiya Vasitələri İşçiləri Həmkarlar İttifaqı tərəfindən keçirilmiş rəy sorğusuna görə H.Əliyevin ideyalarının həyata keçməsindəki fəaliyyəti, Vətənə və xalqa layiqli xidmətlərinə görə “İlin müəllimi” ali media mükafatına layiq görülüb.

Biz də biologiya üzrə fəlsəfə doktoru, dosent Səbinə Ömərovanı Bakı Dövlət Universitetinin (BDU) SABAH Mərkəzinə yeni rəhbər təyin olunması münasibətilə ürəkdən təbrik edir və ona yeni-yeniuğurlar arzulayırıq!..

Aysel MƏDƏDLİ,
ZiM.Az

.