AzTU-nun bir qrup tələbəsi Horadiz əməliyyatı zamanı şəhid olan Vətən oğullarının anım mərasimində iştirak edib

Azərbaycan ordusunun Ermənistanın işğal etdiyi Füzuli rayonunun Horadiz qəsəbəsinin azad olunması üçün keçirdiyi uğurlu əməliyyatlardan 24 il ötür. Bu münasibətlə 704 saylı Hərbi hissənin keçmiş komandirləri, döyüşçüləri ilə yanaşı Azərbaycan Texniki Universitetinin (AzTU) bir qrup tələbəsi də Fəxri və Şəhidlər xiyabanlarını ziyarət edib.

Ziyarətçilər Fəxri xiyabanda ümummilli lider Heydər Əliyevin və görkəmli oftalmoloq alim, akademik Zərifə xanım Əliyevanın məzarları üzərinə gül dəstələri qoyublar.

Daha sonra Şəhidlər xiyabanında Azərbaycanın müstəqilliyi və ərazi bütövlüyü uğrunda canlarından keçmiş qəhrəman Vətən övladlarının məzarları ziyarət edilib, “Əbədi məşəl” abidəsinin önünə əklil qoyulub.

Şəhidlər xiyabanını ziyarət zamanı polkovnik Şair Ramaldanov gənclərə Horadiz əməliyyatı haqqında geniş məlumat verib.
Ş.Ramaldanov bildirib ki, 1994-cü ilin qışında baş verən Horadiz döyüşləri Azərbaycan xalqının qürur mənbəyidir və bu uğurlu əməliyyatın banisi ümummilli lider Heydər Əliyev olub. Ulu Öndərin çağırışından sonra heyətin səfərbər olduğunu və dərhal hücum əməliyyatlarına başlanıldığını deyən keçmiş komandir vurğulayıb ki, Horadiz əməliyyatı nəticəsində Azərbaycanın 23 yaşayış məntəqəsi işğaldan azad edilib.

Maral SULTANQIZI,
Zim.Az

.