ALFAT İSMAYIL OĞLU ƏLİYEV (1946)

Alfat İsmayıl oğlu Əliyev - 1946-cı il sentyabrın 12-də qədim Borçalı mahalında, indiki Gürcüstanın Bolnisi rayonundakı Darvaz kəndində çoxuşaqlı qulluqçu ailəsində anadan olmuşdur.
Anası Xanım Əliyeva SSRİ Ali Soveti Rəyasət Heyətinin Fərman ilə “Qəhrəman Ana” Fəxri adı və eyni adlı Qızıl ulduz ordeni ilə təltif olunmuşdur.

Böyük qardaşları hüquq-mühafizə işçiləri olsalar da, Alfat Əliyev gənc yaşlarından müsiqiyə böyük həvəs göstərmişdir.
O, 1972-ci ildə Azərbaycan SSR Nazirlər Soveti və Mədəniyyət Nazirliyinin qərarı ilə "Qaya" kvarterinə Dövlət Ansamblı statusu verildiyi vaxtlarda Bakıda keçirililən Ümumittifaq miqyaslı vokal yarışmasına qoşulmuş və yarışmada uğurla iştirak etmişdir.
Alfat Əliyevin səsi və ifası müsabiqənin münsiflər heyəti tərəfindən bəyənilmiş və yüksək qiymətləndirilmişdir.
O, Azərbaycan Dövlət Filarmoniyasına dəvət olunmuşdur.
Alfat Əliyevin Filarmoniyadakı çıxışı da alqışlarla qarşılanmışdır.

Elə həmin çıxışına görə də, Alfat Əliyevi tanınmış Azərbaycan aktyoru və rejissoru, Azərbaycan SSR xalq artisti Şəmsi Bədəlbəyli həmin illərdə bədii rəhbəri və direktoru olduğu Azərbaycan Dövlət Musiqili Komediya Teatrına işə dəvət etmişdir.

Alfat Əliyev bir müddət Azərbaycan Dövlət Musiqili Komediya Teatrında çalışmışdır.
Daha sonra isə o, ailə vəziyyətilə əlaqədar olaraq doğma Borçalıya qayıtmışdır.

Vətənpərvər, yurdsevər və xeyirxah bir insan kimi tanınan Alfat Əliyev uzun müddət rayon mədəniyyət evinin solisti olmuş, eyni zamanda, qardaşı Sücayət Əliyevlə birlikdə rayonda keçirilən dövlət tədbirlərində, el şənliklərində, toylarda, eləcə də, ədəbi-bədii və mədəni məclislərdə yaxından iştirak etmiş, el-obanın sevimlisinə çevrilmişdir.

Alfat Əliyev hazırda təqaüddədir, şərəfli ömrünün müdriklik çağlarını yaşayır.
Biz də sevimli el ağsaqqalı Alfat Əliyevə uzun ömür və möhkəm cansağlığı arzulayırıq!..

Müşfiq BORÇALI,
ZiM.Az

.