Polkovnik UCHƏYAT HACISƏYYAD OĞLU ƏLİYEV (1957)

Uchəyat Hacısəyyad oğlu Əliyev - 1957-ci il iyunun 25-də qədim Borçalı mahalında, indiki Gürcüstan Respublikasının Bolnisi rayonundakı Darvaz kəndində qulluqçu ailəsində - polis mayoru Hacısəyyad İsmayıl oğlu Əliyevin ocağında anadan olmuşudur. O, 1974-cü ildə Bolnisi şəhərində rus orta məktəbini bitirmiş, 1974-1975-ci illərdə fəhlə işləmiş, 1975-ci ilin oktyabr ayında Ukrayna SSR-nin Xarkov şəhərində SSRİ Daxili İşlər Nazirliyinin Yanğınsöndürmə texniki məktəbinə qəbul olmuş və 1978-ci ildə həmin məktəbi müvəffəqiyyətlə bitirmişdir.

1978-ci ilin 2 avqustundan etibarən Gürcüstan Respublikası Daxili İşlər Nazirinin əmri ilə Bolnisi rayonu Daxili İşlər Şöbəsinin Yanğınsöndürmə nəzarəti təlimatçısı təyin olunmuşdur.
5 il öz ixtisası üzrə işlədikdən sonra təhsilini davam etdirmək məqsədilə 1983-cü ildə SSRİ Daxili İşlər Nazirliyinin Akademiyasına qəbul olunmuş və həmin Akademiyanı 1988-ci ildə müvəffəqiyyətlə bitirmişdir.

U.Əliyev 1988-1991-ci illərdə Bolnisi və Marneuli rayonlararası xüsusi qarnizonda rəis vəzifəsində xidmət etmişdir.

XX əsrin 90-cı illərində Gürcüstanda baş verən məlum hadisələrlə əlaqədar olaraq, minlərlə soydaşımız kimi, U.Əliyev də məcbur olub, öz işindən, öz evindən, isti ocağından, doğma yurd-yuvasından ayrılıb, Azərbaycana köçmüşdür.
O, Azərbaycan Milli Ordusunun yaradıldığı ilk dövrdə 1991-1993-cü illərdə desant-hücumçu briqada komandirinin müavini vəzifəsində xidmət etmişdir. O, Kəlbəcər, Laçın, Füzuli, Cəbrayıl, Daşaltı (Şuşa) uğrunda gedən hərbi əməliyyatların fəal iştirakçısı olmuşdur.

Daxili xidmət polkovnik-leytenantı U.Əliyev 1993-cü ildən etibarən Azərbaycan Respublikasının Daxili İşlər Nazirliyinin orqanlarında xidməti vəzifəsini davam etdirmiş, məsul vəzifələrdə çalışmış, o cümlədən, Azərbaycan Respublikası Daxili İşlər Nazirliyinin Yanğın Təhlükəsizliyi Baş Dövlət İdarəsinin rəis müavini vəzifəsində şərəflə xidmət etmişdir. Qüsursuz və nümunəvi xidməti nəzərə alınaraq o, vaxtından əvvəl daxili xidmət polkovniki rütbəsi ilə təltif olunmuşdur.

Daxili xidmət polkovniki Uchəyat Əliyev Azərbaycan Respublikasının müharibə veteranıdır və hazırda təqaüddədir.

Biz də polkovnik Uchəyat Əliyevə uzun ömür və möhkəm cansağlığı arzulayırıq!..

Müşfiq BORÇALI,
ZiM.Az


.