AMEA-nın müxbir üzvü İlham Şahmuradovun 60 illik yubileyi keçirilib Biologiya və tibb elmləri, Təbriklər 13 марта 2018 TƏBRİK EDİRİK!..2018-ci il Martın 13-də AMEA Molekulyar Biologiya və Biotexnologiyalar İnstitutunun elmi şurasında AMEA-nın müxbir üzvü,biologiya üzrə elmlər doktoru, professor İlham Əyyub oğlu Şahmuradovun elmi fəaliyyətinə və anadan olmasının 60 illiyinə həsr olunmuş yubiley sessiyası keçirilib.ZiM.Az xəbər verir ki, tədbiri giriş sözü ilə İnstitutun direktoru, akademik İradə Hüseynova açaraq, İlham Şahmuradovun ölkəmizi xaricdə məhz ləyaqətlə təmsil edən ziyalılarımızdan olduğunu vurğulayıb və qeyd edib ki, onun 1999-cu ildə Birləşmiş Krallığın Sanger elmi mərkəzində, 2000-2001-ci illərdə Yaponiyanın Heliks Tədqiqat İnstitutunda, 2001-2005-ci illərdə London Universitetinin Royal Hollovey kollecinin Kompüter Elmi departamentində, 2007-2010-cu illərdə Pakistanın COMSATS İnformasiya Texnologiyası İnstitutunda, 2015-2016-cı illərdə Səudiyyə Ərəbistanının Kral Abdulla adına Elm və Texnologiya Universitetindəki elmi fəaliyyəti buna bariz nümunədir. İlham Şahmuradovun gərgin əməyi və elmi axtarışları nəticəsində insan, heyvan və bitki genomlarında transkripsiyanın start saytlarının və tənzimləyici elementlərinin, ilkin mRNT-nin poliadenilləşmə saytlarının axtarışı üzrə yüksək dəqiqliyə malik bir sıra kompüter analizi vasitələri - PromH, PromHP, TSSP-TCM, və POLYAR proqramları, bitkilərin RNT polimeraza II promotorları üzrə PlantProm məlumat bazası yaradılmışdır.Onun apardığı elmi tədqiqatların nəticələri “Nucleic Acids Research”, “Bioinformatics”, “Plant Molecular Biology”, “BMC Genomics” və “Applied and Computational Mathematics” kimi beynəxlaq elmi jurnallarda və həmçinin “World Scientific” və “Springer Science+Business Media, Humana Press” kimi beynəlxalq nəşriyyatlarında çap olunmuşdur. AMEA-nın müxbir üzvü İlham Şahmuradov 60-dan yuxarı elmi məqalənin, eləcə də bioinformatika terminləri üzrə azərbaycan dilində ilk lüğətin müəllifidir. Onun rəhbərliyi ilə 3 fəlsəfə doktoru hazırlanmış və hazırda İlham müəllim 4 elmlər doktoru, 3 fəlsəfə doktorunun dissertasiya işinə elmi rəhbərlik edir.İlham müəllimin elmi-pedoqoji sahədə səmərəli fəaliyyəti dövlətimiz tərəfindən yüksək qiymətləndirilmiş və o, 2014-cü ildə “Bioinformatika” ixtisası üzrə AMEA-nın müxbir üzvü seçilmiş, 2015-ci ildə isə “Tərəqqi” medalı ilə təltif olunmuşdur.Tədbirdə AMEA-nın müxbir üzvü, professor, b.ü.e.d. Novruz Quliyev, professor, b.ü.e.d. Səftər Süleymanov, əməkdar elm xadimi, k.ü.e.d. Siracəddin Sərkərov və b. çıxış edərək, xatirələrini bölüşərək İlham müəllimi, 60 illik yubileyi münasibəti ilə təbrik edib, Azərbaycan elminə xidmət etmək yolunda yeni-yeni yaradıcılıq uğurları, can sağlığı və ailə səadəti arzulayıblar. Akademik İradə Hüseynova AMEA Molekulyar Biologiya və Biotexnologiyalar İnstitutunun Fəxri fərmanını alimə təqdim edib.Tədbirdə İlham Şahmuradovun həyat və elmi fəaliyyətini əks etdirən “Yol ayrıcı: Riyaziyyatdan Biologiyaya” adlı qısa metrajlı sənədli film nümayiş etdirilib.Daha sonra elmi şurada bir sıra cari məsələlər müzakirə olunub.REDAKSİYADAN:Biz də fürsətdən istifadə edərək, AMEA-nın müxbir üzvü, tanınmış alim, biologiya üzrə elmlər doktoru, çox hörmətli professor İlham Əyyub oğlu Şahmuradovuanadan olmasının 60 illik yubileyi münasibətilə ürəkdən təbrik edir, ona uzun ömür, möhkəm cansağlığı, şərəfli elmi fəaliyyətində yeni-yeni uğurlar arzulayırıq!..Aysel MƏDƏDLİ,ZiM.Az. Muəllif huquqları qorunur. Məlumatdan istifadə etdikdə istinad mutləqdir.