AMEA-nın Azad Həmkarlar İttifaqının VII Qurultayı keçirilib

2017-ci il noyabrın 17-də Azərbaycan Milli Elmlər Akademiyası Azad Həmkarlar İttifaqının (AHİ) VII Qurultayı keçirilib.

Mərkəzi Elmi Kitabxanada təşkil olunan tədbirdə
AMEA-nın prezidenti, akademik Akif Əlizadə, Azərbaycan Həmkarlar İttifaqları Konfederasiyasının (AHİK) sədri, millət vəkili, iqtisad üzrə elmlər doktoru, professor Səttar Möhbalıyev, AMEA Rəyasət Heyətinin üzvləri, Akademiyanın Veteranlar Şurasının, Gənc Alim və Mütəxəssislər Şurasının (GAMŞ), İlk həmkarlar təşkilatlarının səlahiyyətli nümayəndələri iştirak ediblər.

AMEA-nın İctimaiyyətlə əlaqələr şöbəsindən
ZiM.Az-a xəbər veriblər ki, Qurultay Azərbaycan Respublikasının Dövlət himninin səslənməsi ilə başlayıb.

Sonra ümummilli lideri
Heydər Əliyevin, torpaqlarımızın ərazi bütövlüyü uğrunda qəhrəmancasına həlak olan şəhidlərimizin və hesabat dövründə AMEA-nın vəfat etmiş əməkdaşlarının xatirəsi bir dəqiqəlik sükutla yad edilib.

AHİ-nin sədri vəzifəsini icra edən, hüquq üzrə elmlər doktoru, professor Habil Qurbanov çıxış edərək tədbirin gündəliyi haqqında iştirakçılara məlumat verib. Bildirib ki, qurultayın məqsədi AHİ-nin 2012-2017-ci illərdəki fəaliyyətinə dair hesabatının dinlənilməsi, qurumun rəhbər orqanlarının yeni tərkiblərinin seçilməsi, həmçinin digər təşkilati məsələlərin müzakirəsidir.

Daha sonra AHİ-nin Katibliyi, Redaksiya heyəti, Mandat komissiyası və Hesablayıcı komissiyasının tərkibləri müəyyən olunub.

AHİ-nin Mandat Komisiyasının sədri İlkin Əlimuradov çıxış edərək aparılan yoxlamaların nəticələrini təqdim edib. Hesabat üzvlər tərəfindən təsdiq olunub.

Tədbirdə H.Qurbanov qurumun beş illik fəaliyyətinə dair hesabatı tədqim edib. Natiq ötən müddətdə AHİ tərəfindən üzvlərin sosial-iqtisadi maraqlarının təmin edilməsi istiqamətində bir sıra işlər həyata keçirildiyini bildirib. H.Qurbanov sosial vəziyyəti aşağı olan əməkdaşlara maddi yardımın verildiyini, üzvlərin asudə vaxtlarının səmərəli keçirməsi məqsədilə ölkəmizdə və xaricə tur səfərlərinin, müxtəlif idman növləri üzrə yarışların, bayram şənliklərinin təşkil edildiyini vurğulayıb.

Məruzə dinlənildikdən sonra açıq səsvermə yolu ilə beş illik fəaliyyət qənaətbəxş hesab edilib.

Qurultayda Nəzarət-təftiş komissiyasının hesabatı da dinlənilib. Məruzəni təqdim edən komissiyanın sədri, geologiya-mineralogiya elmləri üzrə fəlsəfə doktoru Nağı Nağıyev ötən beş il ərzində İlk təşkilatlardan daxil olan üzvlük haqları və bu vəsaitlərin hansı istiqamətdə sərf edilməsindən danışıb.

Səsvermə yolu ilə Nəzarət-təftiş komissiyasının hesabatı da Qurultay nümayəndələri tərəfindən qənaətbəxş hesab edilib.

Daha sonra Fizika İnstitutunun Həmkarlar Təşkilatının sədri, fizika-riyaziyyat elmləri üzrə fəlsəfə doktoru Sitarə Bağırova, Kataliz və Qeyri-üzvi Kimya İnstitutunun Həmkarlar Təşkilatının sədri, kimya üzrə elmlər doktoru, professor Arif Əfəndi, İnformasiya Texnologiyaları İnstitutunun Həmkarlar Təşkilatının sədri Səyyar Abdullayev, Arxeologiya və Etnoqrafiya İnstitutunun Həmkarlar Təşkilatının sədri, tarix üzrə fəlsəfə doktoru Abuzər Ələkbərov və GAMŞ-ın sədri, fizika üzrə fəlsəfə doktoru, dosent Famin Salmanov çıxış edərək rəhbərlik etdikləri qurumların fəaliyyətləri haqqında məlumat veriblər.

Tədbirdə AHİK-in sədri Səttar Möhbalıyev uzun illik elmi və ictimai fəaliyyətinə görə akademik Akif Əlizadəyə Həmkarlar İttifaqları Ümumi Konfederasiyasının (Rusiya) 25 illiyi münasibətilə təsis edilmiş gümüş xatirə nişanını təqdim edib. Qurultayın işinə uğurlar arzulayan natiq AHİ-nin son beş ildəki fəaliyyətinə dair hesabatın qənaətbxəş olduğunu bildirib, qurum tərəfindən xüsusilə gənclərlə bağlı, əməkdaşların sosial vəziyyəti ilə bağlı həyata keçirilən tədbirləri yüksək dəyərləndirib. Görülən bu işlərin ölkə rəhbərliyinin diqqət və qayğısının göstəricisi olduğunu qeyd edib. Son dövrlərdəki uğurlu fəaliyyətə görə, AMEA-nın prezidenti, akademik Akif Əlizadəyə və AHİ rəhbərliyinə təşəkkürünü bildirib. AMEA AHİ-nin müraciətlərinə AHİK tərəfindən hər zaman baxıldığını söyləyən Səttar Möhbalıyev bundan sonra da öz köməklərini əsirgəməyəcəklərini əlavə edib.

Sonra AMЕA AHİ-nin sədri vəzifəsinə seçki keçirilib. Səsvermə yolu ilə Habil Qurbanov qurumun sədri seçilib.

AMEA-nın prezidenti, akademik Akif Əlizadə çıxış edərək Səttar Möhbalıyevə və tədbir iştirakçılarına təşəkkürünü bildirib. AMEA əməkdaşlarının istirahəti, sağlamlığı, maddi rifahının günün tələblərinə uyğun səviyyəyə qaldırılması, iş və mənzil şəraitinin yaxşılaşdırılması istiqamətində bir sıra mühüm tədbirlər həyata keçirildiyini söyləyən akademik bu yaxınlarda 60-dan çox əməkdaşa mənzil verildiyini diqqətə çatdırıb.
AMEA rəhbəri bundan sonra da əməkdaşların sosial problemlərlərinin həllinin diqqət mərkəzində saxlanılacağını və işlərin davam etdiriləcəyini vurğulayıb.

Qurultayda, həmçinin AMЕA AHİ-nin Rəyasət Heyəti seçilib, qurumun məclisinin və Nəzarət-təftiş komissiyasının yeni tərkibləri və Nizamnaməsinə edilən əlavə və dəyişikliklər təsdiqlənib.

ZiM.Az

.