RAFİQ ZƏBANİ

Rafiq Zǝbani (Rafiq Dadaş oğlu Cəfərov) - Respublikamızın dilbər guşələrindən olan Astara rayonunun Ərçivan qəsəbəsində ziyalı ailəsində dünyaya göz açıb. Atası Dadaş Cəfərov ali təhsilli dil-ədəbiyyat müəllimi, anası Xeyrǝxanım isə evdar qadın olub. 9 övlad (3 qız, 6 oğlan) böyüdüb boya-başa çatdırıblar.
Rafiq müəllim evin 4-cü övladıdır. 8-ci sinifə qədər Ərçivan qəsəbə orta məktəbində təhsil alıb. Sonra isə təhsilini Bakı Fəhlə Gənclər məktəbində davam etdirib. Neftçıxarma üzrə 3 il operator işlədikdən sonra imtahan verərək Moskva Kooperativ İnstitutunun iqtisadiyyat fakültəsinə qəbul olub və bu təhsil ocağını da müvəffəqiyyətlə bitirib.
Vətənə qayıdaraq öz ixtisası üzrə əvvəl Astara rayonunda mağaza müdiri, mərkəzi univermağın direktor müavini, sonra isə direktoru vəzifəsində işləyib. Axırıncı iş yeri olan Astara Balıq Ovu İstehlak cəmiyyətinin sədri vəzifəsində də ləyaqətlə çalışıb. Hazırda təqaüdçü olsa da, «Far-El» MMC-nin təsisçisi və direktorudur.
Rafiq Zǝbani 1971-ci ildə ailə qurub. Dörd övladı - 2 qızı, 2 oğlu var. Övladlarını vətənpərvər ruhda böyüdüb. Dördü də ali təhsil alıb. Rafiq müəllimin nəvələri də bu gün dünyanın ən qabaqcıl məktəblərində təhsil alırlar.
Rafiq Cəfərov 2015-ci ildə həyat yoldaşı ilə birlikdə ağır avtomobil qəzası keçirib.
7 gün koma vəziyyətində qalıb. Komadan ayıldıqdan sonra uşaqlıqdan şair olmaq arzusu onu tək buraxmayıb.
Şair olmaq üçün söz axtarmır, söz onu məcbur edirki, yaz, yarat. Gecə-gündüz qələmə sarılıb, bir-birindən maraqlı, məzmunlu, fəlsəfi, lirik, satirik, məhəbbət və vətənpərvər mövzularında şeirlər yazıb. Şeirləri qısa bir müddət ərzində dillər əzbərinə çevrilib və müəllifə geniş oxucu rəğbəti qazandırıb.

Rafiq Zǝbani artıq iki kitab müəllifidir. «Ölüm yuxusunun şairliyi» adlı ilk kitabı 2019-cu ildə, "Oyanış" adlı ikinci kitabı isə2021-ci ildə tanınmış qələm sahibləri - «Həkəri» qəzetinin baş redaktoru, «Qızıl qələm» media mükafatçısı, şair-publisist Rauf İlyasoğlu və şair-publisist Germanın redaktorluğu ilə nəfis şəkildə çap olunaraq oxucuların ixtiyarına verilib.
Ötən il Türkiyənin Sivas şəhərində "Şairlər" antologiyasında, bu il Bakıda "Şərqin səsi", "Vətən", "Zirvə" və s. ədəbi məcmuələrdə də şeirləri dərc olunan Rafiq Zəbanin qələm məhsulları Azərbaycanın dövri mətbuatında da mütəmadi olaraq çap olunur.

“Şərqin səsi” və “Həkəri” qəzetlərinin redaksiya heyətinin üzvüdür.
“Abdulla Şaiq”, “Zirvə”, “XXI Əsrin ziyalısı”, “Qızıl qələm”, “Xarı-bülbül” mükafatları laureatıdır, eləcə də, başqa bir çox Fəxri diplom və mukafatlara layiq görülüb.

Biz də tanınmış el ağsaqqalı, istedadlı şair, böyük ürək sahibi, çox hörmətli Rafiq Zǝbaniyə uzun ömür, möhkəm cansağlığı, yeni-yeni yaradıcılıq uğurları arzulayırıq və aşağıda onun bir neçə şeirini dəyərli oxucularımıza təqdim edirik.

Müşfiq BORÇALI,
Ramazan RZA,
ZiM.Az


MƏNİM AZƏRBAYCANIM

Bağçaların, bağların,
Uca-uca dağların.
Adın-şöhrətim, şanım,
Mənim Azərbaycanım.

Çeşmələrin çağlayır,
Gülləri sığallayır.
Hələ bundan sonradır,
Sənin gözəl çağların,
Mənim Azərbaycanım.

Həyatımın özüsən,
Baxtımın ulduzusan,
Yaşamaram mən sənsiz,
Sən uşaqlıq çağlarım,
Mənim Azərbaycanım.

Kürün var, Arazın var,
Köksündə Xəzərin var.
Vurğun tək yazarın var,
Düşməninə göz dağım,
Mənim Azərbaycanım.

Hər tərəfin çıraqban,
Gecələrin al-ǝlvan.
Anamın yadigarı,
Sən həm ürək, həm də can,
Vətənim Azərbaycan.

Gözəl yazın, payızın,
İqlimindən nə yazım,
Qara günləri pozum,
Uğrunda getsin canım,
Mənim Azərbaycanım.

Vardır Kürün, Arazın,
İqlimindən nə yazım,
Yaşa ürəyim, canim,
Mənim Azərbaycanım.

Baxçaların, bağların,
Uca-uca dağların.
Adım, şöhrətim, şanım,
Mənim Azərbaycanım.


ANA DİLİM

Qiblǝgahım, anam, üzünə qurban
Ağarmış saçına, gözünə qurban,
Mənə lay-lay çalmış ana dilimdə
Şirin kəlməsinə, sözünə qurban.

Mənə can söyləmiş anam bu dildə,
Anamın qoxusu yoxdur bir güldə.
Bu dildə yazdığım hər şirin nəğmə,
İllərdir dolaşır obada, eldǝ.

Sən ey, ana dilim, ey xoş ovqatım,
Bayramım, şənliyim, toyum, büsatım.
Bu dildə yaranıb, dillərə düşüb,
Şikəstəm, gəraylım, qoşmam, bayatım.


MƏNİM ƏSGƏR QARDAŞIM

Qarabağım baş tacım,
Qarabağım göz yaşım.
Kədər idi, qəm idi,
Mənim ürək sirdaşım.

İllər boyu çən oldu,
Saçımızda dən oldu.
Əsgərim xilas etdi,
Ürəyimiz şən oldu.

Əsgərim tarix yazdı,
Düşmənə qəbir qazdı.
Azad Qarabağımda,
Yenə çiçəkli yazdı.

Sən ey əsgər qardaşım,
Ey igid vətəndaşım.
Sənin sayəndə artıq,
Yenə ucadır başım.


VƏTƏN ÜÇÜN

Zirvə dağa yaraşır,
Güllər bağa yaraşır.
Vətənini qorumaq,
Ərənlərə yaraşır.

Zirvə dağlar üçündü,
Dağlar Vətən üçündü.
Güllər bağlar üçündü,
Bağlar Vətən üçündü.

Biz Vətənin övladı,
Şərəf vətəndaş adı.
Vətən namusumuzdur,
Məhv edərik biz yadı.

Şöhrət-şanımız Vətən,
Axan qanımız Vətən.
Yolunda qurban olsun,
Şirin canımız, Vətən.


VƏTƏNDAŞ

Varsa vətən,var vətəndaş,
Vətəndaşsız vətən olmaz.
Vətəndaşsız vətən olsa,
Onda, o da, vətən olmaz.

Nə insandır, nə vətəndaş,
Gəlməyəydi dünyaya kaş.
Qəlbi xəbis, ürəyi daş,
İnsan olmaz, nədən olmaz?!


SƏN HƏYATIN MƏNASI

Sən həyatın mənası,
Sən bir quzu balası.
Təbii sən, gözəlsən,
Sən həyatın aynası.

Çiçəksən, əldə çiçək,
Sanki çiçəkli mələk.
Heyran qalmışam sənə,
Çiçək də dərər çiçək?


TƏR GÜLÜM

Hava yaman istidi,
Bu istidə öz gülüm.
Mənə - günaydın - dedi,
Açdı süsǝn-sünbülüm.

İllər öncə tər gülüm,
Açılmamış gül idi.
Aşiqi-bülbül idi,
Ləçəyi tel-tel idi.

ZiM.Az

.