Bolnisidə NOVRUZ BAYRAMI qeyd olunub

2026-cı il martın 17-də qədim Borçalı mahalında, indiki Gürcüstanın soydaşlarımızın kompakt halda yaşadıqları Bolnisi rayonunda fəaliyyət göstərən "Qafqaz Hüquq və İnteqrasiya Mərkəzi"ndə İl-axır çərşənbəsi və Novruz bayramı münasibətilə bayram tədbiri təşkil olunub.

ZiM.Az-ın Gürcüstandakı xüsusi müxbiri bildirir ki, tədbiri giriş sözü ilə açıq elan edən mərkəzin icraçı direktoru Rezo Həsənov iştirakçıları salamlayaraq onları Novruz bayramı münasibətilə səmimi qəlbdən təbrik edib.
O, çıxışında bu qədim bayramın xalqımız üçün daşıdığı mənəvi dəyərdən, birlik və həmrəylik ruhunu gücləndirməsindən bəhs edib.

Daha sonra söz mərkəzin Azərbaycan dili müəllimi Fatma Əliyevaya verilib. O da öz növbəsində bu əlamətdar gün münasibətilə iştirakçılara xoş arzularını çatdırıb, Novruzun milli-mənəvi irsimizdəki yerindən danışıb.

Ardınca Gürcüstan parlamentinin keçmiş deputatı Ramiz Bəkirov, Dəllər ictimai məktəbinin müəllimi Əlixan Yahyaoğlu, Kəpənəkçi və Darvaz ictimai məktəblərinin Azərbaycan dili müəllimi Zakir Məmmədov və digər ziyalılar çıxış edərək tədbir iştirakçılarını təbrik edib, Novruz bayramının sülh, yenilənmə və dostluq rəmzi olduğunu vurğulayıblar.

Eyni zamanda, Dəllər ictimai məktəbinin əməkdaşı Natavan Mehdiyeva Novruz bayramının tarixi, qədim kökləri və zəngin ənənələri haqqında ətraflı məlumat verib, bayramın əsrlər boyu yaşadılmasının əhəmiyyətini qeyd edib.

Tədbirdə, Bolnisi Mərkəzi Muzeyinin əməkdaşı Temo Urumaşvili də çıxış edərək iştirakçıları salamlayıb, Novruz bayramı münasibətilə xoş arzularını çatdırıb və bu cür tədbirlərin mədəni əlaqələrin inkişafında rolunu xüsusi vurğulayıb.

Bədii hissədə Bolnisi rayonunun Həsənxocalı ictimai məktəbinin şagirdlərinin hazırladıqları milli rəqslər təqdim olunub. Onların çıxışları iştirakçılar tərəfindən böyük maraq və alqışla qarşılanıb, bayram əhval-ruhiyyəsi daha da yüksəlib.

Tədbirin musiqili hissəsində isə Aşıq Samir Qoçulu və Aşıq Vəli Cəfərli saz ifaları ilə çıxış edərək tədbirə xüsusi rəng qatıb, öz ustalıqlı ifaları ilə iştirakçılara unudulmaz anlar yaşadıblar.

Bayram mehriban, səmimi mühitdə yekunlaşıb.
Sonda tədbir iştirakçıları xatirə üçün foto-şəkillərçəkdiriblər.

REDAKSİYADAN:

Biz də Redaksiya Heyətimiz adından,
dəyərli ziyalımız Rezo Həsənov başda olmaqla, onun rəhbərlik etdiyi "Qafqaz Hüquq və İnteqrasiya Mərkəzi"nin bütün müəllim və şagird kollektivini, eləcə də, Gürcüstanda yaşayan bütün soydaşlarımızı bir daha Ramazan və Novruz Bayramları münasibətilə ürəkdən təbrik edir, onlara uzun ömür, möhkəm cansağlığı, bol ruzu və yeni-yeni uğurlar arzulayırıq!..

Müşfiq BORÇALI,
ZiM.Az

.