AzTU məzununun uğur hekayəsi: Professor SÜBHAN NAMAZOV

Azərbaycan Texniki Universitetinin (AzTU) bir çox məzunu hazırda öz fəaliyyətini bir zamanlar tələbəsi olduğu ali təhsil müəssisəsinin əməkdaşı, müəllimi və ya rəhbər işçisi kimi davam etdirir.

AzTU-nun Beynəlxalq əlaqələr üzrə prorektoru, professor Sübhan Namazov 1994-cü ildə universiteti fərqlənmə diplomu ilə bitirib, tələbəlik illərində İSESCO beynəlxalq təqaüdünə layiq görülüb. 1997-ci ildə vaxtından əvvəl namizədlik dissertasiyasını müdafiə edərək elmlər namizədi elmi dərəcəsi alan Sübhan Namazov 2001-2002-ci illərdə DAAD təqaüdü qazanaraq Almaniyanın nüfuzlu Aaxen Texniki Universitetində (RWTH Aachen) elmi-tədqiqatçı kimi çalışıb. 2007-ci ildə elmlər doktoru elmi dərəcəsi alıb, 2010-cu ildə isə professor adına layiq görülüb.

Biri Misir vətəndaşı olmaqla 6 nəfər fəlsəfə doktoru yetişdirən Sübhan Namazov 2003-2011-ci illərdə AzTU-nun tədris şöbəsinin müdiri olub, 10 ilə yaxın müddətdə universitetin “Metallurgiya və metalşünaslıq” kafedrasına rəhbərlik edib. 2016-cı ildə Rusiya Mühəndislik Akademiyasının akademiki seçilib. Bir monoqrafiya, 5 dərslik, 3 patent və müəlliflik şəhadətnaməsinin müəllifidir. Sübhan Namazovun 240 elmi və tədris-metodiki işləri Azərbaycanla yanaşı, Almaniya, Türkiyə, Rusiya, ABŞ, İspaniya, Ukrayna, Slovakiya, Türkiyə, Litva, İsveçrə və başqa ölkələrdə ingilis, alman, rus və ispan dillərində dərc edilib.

2012-2015-ci illərdə AzTU-da yerinə yetirilən TEMPUS layihəsi çərçivəsində “Qiymətləndirmə və keyfiyyət menecmenti” üzrə mərkəzin rəhbəri, ERASMUS+ Nizami layihəsinin AzTU üzrə koordinatoru, müxtəlif vaxtlarda ERASMUS+ layihəsi çərçivəsində Almaniyanın Köln Tətbiqi Elmlər Akademiyası, Polşanın Varşava Politexnik Universiteti, Almaniyanın Rostok Universiteti, Aaxen Texniki Universiteti, Xemnits Texniki Universiteti, Brandenburq Texniki Universiteti, Drezden Texniki Universiteti, Çexiyanın Leberik Texniki Universiteti, Fransanın Monpolye Universitetində müxtəlif treninq və seminarların iştirakçısı olub. Hazırda Polşanın Varşava Texnologiya Universitetinin koordinatorluğu ilə 6 ölkədən 18 tərəfdaşla yerinə yetirilən “Nəqliyyat xidmətləri üçün böhran və risklər mühəndisliyi (CRENG)” adlı layihənin AzTU üzrə koordinatorudur.

Azərbaycan Respublikası Prezidenti yanında Elmin İnkişafı Fondunun “Təhsil-Elm İnteqrasiyası” Qrant Layihəsinin rəhbəri olan Sübhan Namazov 2011-ci ildə “Azərbaycan Respublikası Qabaqcıl Təhsil İşçisi Döş Nişanı” ilə təltif olunub.

ZiM.Az

.