AzTU-da Xocalı soyqırımının 30-cu ildönümünə həsr olunan anım tədbiri keçirilib

Azərbaycan Texniki Universitetində (AzTU) Xocalı soyqırımının 30-cu ildönümünə həsr olunan anım tədbiri keçirilib.

Əvvəlcə torpaqlarımızın ərazi bütövlüyü uğrunda canlarından keçən Vətən övladlarının, Xocalı soyqırımı qurbanlarının əziz xatirəsi bir dəqiqəlik sükutla yad edilib, Azərbaycanın Dövlət Himni səsləndirilib.

Daha sonra Xocalı soyqırımının 30-cu ildönümünə həsr olunan videoçarx nümayiş etdirilib.

AzTU-nun rektoru Vilayət Vəliyev 30 il əvvəl erməni təcavüzkarlarının Xocalıda törətdiyi soyqırımından danışıb. Bildirib ki, fevralın 25-dən 26-na keçən gecə Xocalıda 613 nəfər amansızlıqla qətlə yetirilib. Bu soyqırımı siyasəti nəticəsində bir şəhər yer üzündən silinib, 8 ailə tamamilə məhv edilib. Rektor deyib ki, bu faciə dünya tarixində ən dəhşətli kütləvi teror aktı və insanlığa sığmayan cinayət kimi qalacaq. O da qeyd olunub ki, Xocalı faciəsi əsrlər keçsə də xalqımızın qan yaddaşından silinməyəcək.

Sonra Milli Məclisin deputatı, ürək-damar cərrahı Rəşad Mahmudov çıxış edib. Millət vəkili bildirib ki, ermənilərin ideologiyası kin və nifrət üzərində qurulub. Erməni vandalları həmin gecə Xocalıda 613 nəfəri məhz azərbaycanlı olduğu üçün insanlığa sığmayan işgəncə ilə qətlə yetirib. Xocalıda misli görünməyən soyqırımı törədən erməni təcavüzkarları və havadarları tarix qarşısında cavab verəcək. Rəşad Mahmudov deyib ki, bu gün Azərbaycan xalqı qalib xalqdır. 44 günlük Vətən müharibəsində qazanılan qələbə xalq olaraq hər birimizin duruşunu, baxışını dəyişdi. Bu qələbə həm də onu göstərdi ki, Azərbaycan xalqı öz ərazi bütövlüyünü bərpa etməyə qadirdir.

Xocalı Rayon İcra Hakimiyyətinin şöbə müdiri, Milli Qəhrəman Tofiq Hüseynovun oğlu, faciənin canlı şahidi Murad Hüseynov həmin gecə baş verən dəhşətli mənzərədən danışıb. Qeyd edib ki, Xocalıda qətlə yetirilən 613 nəfərdən 49-u onun yaxın qohumu və ailə üzvü olub. Murad Hüseynov ermənilərin törətdiyi bu vəhşiliyin heç vaxt unudulmayacağını deyib.

Tədbir tələbələrin hazırladığı şeir kompozisiyası ilə davam edib.

ZiM.Az

.