“Gürcüstan” qəzetinin redaktor müavini Elman Kələyev vəfat edib

Elman Kələyev institutdan sonra hələ tələbə ikən müntəzəm əlaqə saxladığı Tiflisdə nəşr olunan
“Sovet Gürcüstanı” qəzetində ştatdankənar müxbir vəzifəsində çalışıb.
1974-cü ilin noyabr ayından ali təhsilli mütəxəssis kimi Odessa şəhərində hərbi xidmətdə olub.
Hərbi xidmətdən tərxis edildikdən sonra yenidən “Sovet Gürcüstanı” qəzetində fəaliyyətini davam etdirib.
1979-cu ilin mayın 15-də “Sovet Gürcüstanı” qəzetinin ştatdankənar şöbəsinin müdiri vəzifəsinə təyin edilib.
1980-ci il sentyabrın 1-dən 1982-ci il iyunun 31-dək Bakı Ali Partiya Məktəbində təhsil alıb.
Həmin il yenidən “Sovet Gürcüstanı” qəzetində müxbir vəzifəsində çalışıb.
1984-cü il mayın 4-də baş müxbir, 1989-cu il fevralın 4-də redaksiyanın kənd təsərrüfatı şöbəsinin müdiri
təyin olunub və redaksiya heyətinin üzvü seçilib.
1991-ci il oktyabrın 10-da “Gürcüstan” (keçmiş "Sovet Gürcüstanı") qəzetinin məsul katibi təyin edilib.
2014-cü ilin noyabr ayından isə redaktor müavini vəzifəsində çalışırdı.

1974-cu ildən indiyədək "Gürcüstan" qəzetində müxtəlif vəzifələrdə çalışan Elman Kələyev Azərbaycan dilində çıxan bir neçə ədəbi-bədii və lüğət kitablarının redaktoru olub və “Gürcüstan Konstitusiyası”, seçki haqqında məcəllələri və müxtəlif nəşrləri redaktə edib.

O, Gürcüstanda nəşr olunan “Əhli-Beyt” jurnalının baş redaktoru olub,
Türkiyənin "Anadollu" agentliyinin Gürcüstan təmsilçiliyində çalışıb.
2005-ci ildən APA-nın (Azəri-Press Agentliyinin) Gürcüstan bürosunun əməkdaşı vəzifəsində çalışıb.
Jurnalistika sahəsində çalışarkən Elman Kələyev Gürcüstanın və Azərbaycanın bir sıra mərkəzi qəzet və
jurnallarında, radio verilişlərində, eləcə də Moskvada nəşr edilən “Panorama Azerbaycana” qəzetində
müxtəlif səpgili yazılarla müntəzəm çıxış edib.

1978-ci ildən 1990-cı ilədək Sovet hökuməti dağılanadək SSRİ Jurnalistlər İttifaqının üzvü olan
Elman Kələyev Gürcüstan müstəqillik əldə etdikdən sonra isə Gürcüstan Jurnalistlər Birliyinin üzü
və birliyin yeddinci qurultayının nümayəndəsi seçilib.

Elman Kələyev mətbuat sahəsində səmərəli fəaliyyət göstərdiyinə görə,
Gürcüstan prezidentinin 1997-ci il 16 oktyabr tarixli fərmanı ilə
“Şərəf” medalına və digər mükafatlara layiq görülüb.

2015-ci il mayın 12-də Gürcüstanda nəşr olunan azərbaycandilli
“Gürcüstan” qəzetinin redaktor müavini Elman Hüseyn oğlu Kələyev
Gürcüstan jurnalistikasında uzunmüddətli uğurlu fəaliyyət göstərdiyinə görə
“Əməkdar Jurnalist” adına layiq görülüb.

Biz də Gürcüstanda şərəfli bir ömür yaşamış dəyərli soydaşımız,
Gürcüstanda Azərbaycan mətbuatının inkişafında
əvəzsiz xidmətləri olan əziz eloğlumuz,
xalqımızın sevimli ziyalısı, tanınmış ictimai xadim,
“Gürcüstan” qəzetinin redaktor müavini,
çox hörmətli qələm dostumuz,
Əməkdar jurnalist Elman Kələyevin
vəfatından kədərləndiyimizi bildirir, onun ailəsinə,
yaxınlarına və doğmalarına dərin hüznlə başsağlığı verir
və bildirirk ki,Elman Kələyevin əziz xatirəsi
onu tanıyanların qəlbində daim və əbədi olaraq
hər zaman yaşayacaq...
Allah rəhmət eləsin!.. Ruhu şad olsun!..