Unudulan alimimiz Paşa Cəfərov haqq dünyasına qovuşdu

Onu axtaran, yada salan olmadı...

Paşa Abbasqulu oğlu Cəfərov 1937-ci ildə
Tovuz rayonunun Bozalqanlı kəndində
anadan olmuşdur.
Atası 1943-cü ildə Böyük Vətən müharibəsində həlak olub, anası isə 1976-cı ilədək kolxozda çalışıb.

A.S.Puşkin adına orta məktəbi bitirdikdən sonra 1955-ci ildə Azərbaycan Kənd Təsərrüfatı İnstitutunun Zootexnika fakültəsinə daxil olub və 1960-ci ildə həmin institutu bitirərək alim-zootexnik ixtisasına yiyələnib.

1960-cı ilin may ayından, 1962-ci ilin sentyabr ayına kimi Azərbaycan Kənd Təsərrüfatı Nazirliyinin təyinatı ilə Tovuz rayonu Nizami adına kolxozda baş zootexnik vəzifəsində işləyib.
1962-ci ilin oktyabr ayında Azərbaycan Kənd Təsərrüfatı İnstitutunun “Qoyunçuluq” ixtisası üzrə “Xüsusi heyvandarlıq” kafedrasının əyani aspiranturasına daxil olub.
1964-cü ildə aspiranturada oxuduğu müddətdə partiya sıralarına qoşulub, 1965-1970-ci illərdə Fakültə Partiya Təşkilatı Büro üzvü olub.

1965-ci ildə aspiranturanı müvəffəqiyyətlə bitirərək, 1966-cı ilin noyabr ayında namizədlik dissertasiyasını müdafiə edib.
1967-ci ildə Ali Attestasiya Komissiyası tərəfindən kənd təsərrüfatı elmləri namizədi alimlik dərəcəsi adına layiq görülüb.

1965-ci ildən AKTA-da dərs deməklə, əvvəlcə assistent, 1969-cu ildən 1990-cı illərə kimi dosent olub, 1979-1980 və 1989-1994-cü illərdə zoomühəndislik fakültəsinin dekanı vəzifəsində çalışıb.

1987-1989 və 1998-2003-cü illərdə “Heyvandarlıq və heyvandarlıq məhsullarının istehsalının texnologiyası” kafedrasında kafedra müdiri vəzifəsində işləyib.

P.Cəfərov 45 ildən artıq, AKTA-da işlədiyi müddətdə dəfələrlə respublika tədbirlərində iştirak etmişdir.
Respublikanın, Gəncə şəhərinin, AKTA-nın ictimai işlərində yaxından iştirak etmiş və öz əməyini əsirgəməmişdir.
O, gənclik dövründən bu günədək ictimai əsaslarla komsomol, partiya və həmkarlar təşkilatlarında rəhbər vəzifələrdə çalışmışdır.

P.Cəfərov 1971-1973-cü illərdə AKTA-nın Həmkarlar İttifaqı Təşkilatına rəhbərlik etmişdir.

İşlədiyi müddətdə Moskva, Leninqrad, Kiyev, Alma-Ata, Tbilisi, Stavropol və s. şəhərlərdə elmi konfrans və simpoziumlarda məruzələrlə çıxışlar etmişdir.
100-dən çox elmi əsərin, 5 dərs vəsaitinin, 2 elmi ixtiranın, onlarla proqram və metodiki göstərişin müəllifidir.

Elmimizin, təhsilimizin inkişafında öz töhfəsini vermiş, bu yolda böyük əmək sərf etmiş dəyərli insanımız Paşa Cəfərov illərlə yataq xəstəsi oldu, unuduldu, yaddan çıxdı.
2016-cı ilin dekabrında uzun sürən xəstəlikdən sonra vəfat etdi.
O, artıq haqq dünyasındadır.

Allah rəhmət eləsin...

Günel Məmmədova,
ZiM.Az