ARZU GÖYTÜRK: BİR AZ DƏLİ QADINAM

ARZU GÖYTÜRK: BİR AZ DƏLİ QADINAMARZU GÖYTÜRK - (Arzu Ramiz qızı Dadaşova) - 1981-ci ildə Qobustan şəhərində (Şamaxının keçmiş Mərəzə qəsəbəsində) dünyaya göz açıb. 1998-ci ildə H.Z.Tağıyev qəsəbəsindəki 6 saylı orta məktəbi bitirib. Həmin il Sumqayıt Pedaqoji Seminariyasına qəbul olub. 2001-ci ildə Seminariyanı orta məktəbdə ibtidai sinif müəlliməsi ixtisası üzrə bitirib. Hazırda Sumqayıt şəhər "Məktəbdənkənar tərbiyyə işi" mərkəzində müəllimə işləyir. Sumqayıt şəhər H.Z.Tağıyev qəsəbəsində yaşayır. Ailəlidir, iki övladı var.


BİR AZ DƏLİ QADINAM

İncik, küskün sözümü,
Bəlkə də naz bilirsən.
Sənə ömrümü verdim,
Yenə də az bilirsən.

Məni tanı, mən eşqsiz
Yoxam, ölü qadına.
Bir az dəlisov qadın,
Bir az dəli qadınam.

Qəlbim ərköyün uşaq,
Bunu gözəl bilirsən.
Ağlayıram küsəndə
Dəli deyib, gülürsən.

Gül, doyunca gül mənə
Mən gülməli qadınam.
Bir az dəlisov qadın,
Bir az dəli qadınam.

Bilirəm gedəcəksən,
Qəlbimin həsrətisən.
Mən niyə sevdim səni?
Sən özgə qismətisən

Həyat öldürər məni,
Mən ölməli qadınam.
Bir az dəlisov qadın,
Bir az dəli qadınam


ELƏ DARIXIRAM Kİ

Yığmışam məhəbbətin,
Qəmini ürəyimə.
Salmışam sənin kimi,
Dəlini ürəyimə.

Sən gedəli yollara,
O qədər baxmışam ki.
Qurban olum geri dön!
Elə darıxmışam ki.

Bu dopdolu dünyada
Mən sənsiz tənha, qərib.
Tanrı səni ömrümü,
Çürütməkçün göndərib?

Sənsiz həyat yox imiş,
Sənsiz mən yoxmuşam ki.
Qurban olum geri dön!
Elə darıxmışam ki.

Nəfəsinin, ətrinin
Qoxusuna həsrətəm.
Gecənin rahat, şirin
Yuxusuna həsrətəm.

Zülmət, səssiz gecədən
O qədər qorxuşam ki.
Qurban olum geri dön!
Elə darıxmışam ki.
Elə darıxmışam ki...


DEMƏK SEVİRSƏN

Əlimə toxunanda,
Əyər əlin əsirsə,
Ürəyin daha möhkəm,
Vurursa, tələsirsə
Demək məni sevirsən.

Qüsurumu görməyib,
Düzümü görürsənsə.
Yerdə, göydə hər yerdə
Üzümü görürsənsə
Demək məni sevirsən.

Bir ümid alırsansa,
Telefonun səsindən.
Mən sənə doğmayamsa,
Özündən, nəfəsindən
Demək məni sevirsən.

Qəlbin alovlanırsa,
Sən, məni görən kimi
Ən şaxtalı qış belə,
Üşütmürsə qəlbini
Demək məni sevirsən.

Adi baxışım belə,
Səninçün özəldisə,
Gözündə əl-ayağım,
Gülüşüm gözəldisə ,
Demək məni sevirsən.

Məni qısqanan kimi
Dəliyə dönürsənsə,
Unutdum! Bitdi artıq!
Sevmirəm! Deyirsənsə
Demək məni sevirsən.


ÜRƏYİMİN EVİ

Ürəyimin evini,
Eylədi talan eşqin.
Başına dəysin sənin
Yalançı,yalan eşqin!
Gözlərinə düz baxan,
Gözümdən utan barı.
Riyakar eşqin üçün,
Özündən utan barı..
Daha sənə yoxdu yer
Bu evdə, bu ocaqda!
Ağac xarab meyvəni,
Saxlamayır budaqda!
Yaxın durma,toxunma!
İstəmirəm sevgini,
Çürük məhəbbətinlə,
Çürüdərsən qəlbimi...

.
Muəllif huquqları qorunur.
Məlumatdan istifadə etdikdə istinad mutləqdir.
Rəy yazın: