Professor Mədəd Çobanovun 80 illik yubileyinə həsr olunan elmi sessiya keçirilib

2017-ci il İyulun 12-də Azərbaycanda Atatürk Mərkəzində görkəmli alim, məşhur dilçi,
tanınmış türkoloq,
zəhmətkeş tədqiqatçı, Nyu-York Elmlər Akademiyasının akademiki, uzun müddət Azərbaycan Ali Hərbi Dənizçilik Məktəbində "Dillər" kafedrasının müdiri və Azərbaycan Respublikasının Prezident yanında Ali Attestasiya Komissiyasının Ekspert Şurasının üzvü olmuş filologiya elmləri doktoru, professor
Mədəd Çobanovun 80 illik yubileyinə həsr edilən elmi sessiya keçirilib.

ZiM.Az xəbər verir ki, tədbirdə M.Çobanovun “Azərbaycan şəxs adları” və “Azərbaycan antroponimiyasının əsasları” kitablarının yenidən işlənmiş və əlavələr olunmuş üçüncü nəşrləri, eləcə də yubilyara həsr olunmuş “Elin və elmin ağsaqqalı (Professor Mədəd Çobanovun bədii obrazı)” kitabı təqdim olunub.

Tədbiri giriş sözü ilə Atatürk Mərkəzinin rəhbəri, Milli Məclisin deputatı, AMEA-nın həqiqi üzvü, akademik Nizami Cəfərov açıb, görkəmli alimin həyat və fəaliyyətindən bəhs edib. Akademik bildirib ki, 80 yaşını təbrik etdiyimiz yubilyar - professor M.Çobanov Azərbaycan dialektologiyası, onomastikası, ümumi türkoloji məsələlər, müasir Azərbaycan ədəbi dili, dilin tədrisi metodikası, dil əlaqələri, ədəbi tənqidlə bağlı 80-ə yaxın kitabın, 28 tədris proqramının, 600-dək elmi məqalənin, ölkə həyatının siyasi, iqtisadi və mədəni-maarif məsələlərinə həsr olunmuş 220-dən çox oçerkin müəllifidir. O, 60-a yaxın kitabın redaktoru, rəyçisi və tərcüməçisi, 110 elmi konfransın fəal iştirakçısı, 100-dən çox doktorluq və namizədlik dissertasiyalarının opponenti və rəyçisi olub. Onun elmi-pedaqoji fəaliyyətinə dair bir neçə kitab, onlarca məqalə, əsərləri haqqında 100-dək rəy, 60-a yaxın şeir və oçerk yazılıb.

Tədbirdə N.Cəfərovun yubilyara həsr etdiyi “Zəhmətkeş alim, tanınmış dilçi-türkoloq” kitabından da danışılıb. Məlumat verilib ki, kitabda M.Çobanovun mənalı həyat yolu, ictimai, elmi-pedaqoji, həmçinin türk dieloktoloqu, onomatoloqu, antroponimisti kimi məhsuldar fəaliyyətindən bəhs olunur.

Kitabı Ulu öndər Heydər Əliyevin “Müstəqil Azərbaycan dövlətinin əsas ideyası azərbaycançılıqdır. Hər bir azərbaycanlı öz milli mənsubiyyətinə görə qürur hissi keçirməlidir” sözləri ilə başlayan müəllif ilk növbədə, türkologiya sahəsində xüsusi mövqeyə malik olan, alimlər arasında öz səsi, öz nəfəsi və qələmi ilə fərqlənən alimlərimizdən olan Mədəd Çobanovun Ümummilli lider Heydər Əliyevə həsr olunmuş “Görkəmli strategiyaçı” adlı kitabı və digər 2 cilddən ibarət “Türk ədəbi dillərinin birliyinə doğru”, “Həyatnamə” kimi sanballı əsərləri haqqında oxuculara ətraflı məlumat verir.

Qeyd olunub ki, professor M.Çobanov Azərbaycan-gürcü xalqlarının tarixi və ədəbi əlaqələri sahəsindəki xidmətlərinə görə 2008-ci ildə GUAM təşkilatının diplomu, 2011-ci ildə “Ən yaxşı vətənpərvər tədqiqatçı-alim – ilin alimi “Qızıl medal”ı ilə təltif olunub. 2012-ci ildə isə “Dədə Qorqud” Fondu yubilyarı “Qızıl ürək” qızıl medalı ilə mükafatlandırıb.

Akademik Nizami Cəfərov onu da bildirilib ki, professor, Nyu-York EA-nın akademiki Mədəd Çobanov çoxşaxəli elmi və metodik yaradıcılığa malik olan yenilikçi alimlərimizdəndir. Əsərləri Azərbaycan, özbək, qazax, qırğız, türkmən, rus, gürcü və başqa xalqların dillərinə tərcümə olunub. O, hansı mövzuda yazırsa yazsın, onun araşdırmalarına söz ola bilməz... Yaşının ahıl çağlarını yaşayan bu nurlu insan axtarıb-aramaqdan, dilimizin bu günkü vəziyyətinə, görkəminə nəzər salmaqdan doymur, yorulmur.

AMEA-nın Nəsimi adına Dilçilik İnstitutunun direktoru, akademik Möhsün Nağısoylu professor M.Çobanovun elmi əsərlərinin əhəmiyyətindən söhbət açaraq ona yeni yaradıcılıq uğurları arzulayıb.

Sonra söz Azərbaycan Dövlət Pedaqoji Universitetinin "Azərbaycan dilçiliyi" kafedrasının müdiri, Əməkdar Elm Xadimi, görkəmli türkoloq-alim, filologiya elmləri doktoru, professor Nizami Xudiyev M.Çobanovun dilçi filoloqlarımız arasında öz dəst-xətti ilə seçildiyini diqqətə çatdırıb. N.Xudiyev qeyd edib ki, bir alim kimi M.Çobanovun yaradıcılığı olduqca genişdir. O, gənclik enerjisi ilə araşdırmalar aparır, yeni-yeni uğurlara, nailiyyətlərə imza atır. Onun əsərləri elmi-nəzəri və təcrübi cəhətdən çox əhəmiyyətlidir.

Daha sonra yubilyarın həmkarları çıxış ediblər. Respublikamızın tanınmış alimləri - Bakı Slavyan Universitetinin keçmiş rektoru, filologiya elmləri doktoru, professor Asif Hacılı, filologiya elmləri doktoru, professor Nəbi Əsgərov, Dəniz Akademiyasının keçmiş rektoru, AAHDM-nin kafedra müdiri Məmmədağa Quliyev, Bakı Dövlət Universitetinin kafedra müdiri Knyaz Aslan və başqalarının məruzələri dinlənilib.

Görkəmli alimin elmi pedaqoji fəaliyyətindən bəhs edən Azərbaycan Təhsil Şurasının sədri, professor Əjdər Ağayev M.Çobanovun əsərlərinin elmi-nəzəri və təcrübi cəhətdən çox əhəmiyyətli olduğunu vurğulayıb və professor M.Çobanovu "Kamil ziyalı" Fəxri diplomunu təqdim edib.

Əməkdar İncəsənət xadimi Eyvaz Borçalı, Azərbaycan Aşıqlar Birliyinin katibi Musa Nəbioğlu, uzun müddət Milli Məclisdə baş məsləhətçi vəzifəsində çalışmış Əmirxan Babaşov, İrəvan Teatrının direktoru İftixar Piriyev, alimin Tbilisi Dövlət Pedaqoji Universitetində vaxtıilə dərs dediyi tələbələrindən - Gürcüstan-Ukrayna Universitetinin prorektoru, professor Mahmud Hacıxəlilov, ADPU-nun şöbə müdiri, filologiya elmləri namizədi, dosent Razim Məmmədli, Bakı Slavyan Universitetinin dosenti, filologiya elmləri namizədi Gültəkin Əliyeva, Azərbaycan Radiosunun Direktor müavini Mehman Vəliyev, "Şərqin səsi" qəzetinin redaktor müavini Murtuz Fərhadoğlu, Sabir Quluyev, Zakir İsmayılov, eləcə də alimin Darvaz kənd orta məktəbində vaxtı ilə dərs dediyi şagirdlərindən - hazırda Moskvada çalışan məşhur iş adamı və mesenat Ziya Abbasov, ehtiyatda olan hərbi polkovnik-leytenant Nazim Musayev və başqaları çıxış edərək görkəmli alimin 80 illik həyat yoluna nəzər salaraq onun apardığı elmi araşdırmaların türkologiya tarixində xüsusi yeri olduğunu bildiriblər.

Daha sonra "Kredo" qəzetinin Baş redaktoru Əlirza Xələfli, "Sabah" qəzetinin Baş redaktoru Şərif Kərimli, şairlərdən Dilsuz Musayev, Sabir Sadaxlı, Zamin Təhməzov, Xəyyam Nəbiyev, Əlizamin, Vəli Xramçaylı, Telli Sənəm və başqaları çıxış edərək yubilyarla bağlı öz ürək sözlərini söyləyiblər.

“Qafqaz-Press” İctimai Birliyinin sədri Azadə Taleh Abbasqızı yubilyarı təbrik edib və ona "Qız qalası" diplomunu təqdim edib.

Gürcüstan Azərbaycanlıları Konqresinin Bakıdakı nümayəndəsi Sərkərdə Sərxanoğlu çıxış edərək, Konqresin sədri Hüseyn Yusifovun yubilyara ünvanladığı təbrik məktubunu oxuyub, bildirib ki, professor M.Çobanov Konqresin Fəxri Fərmanı ilə təltif olunub. S.Sərxanoğlu onu da diqqətə çatdırıb ki, görkəmli alimin yubileyi yaxın günlərdə Gürcüstanda da təntənə ilə qeyd olunacaq və Fəxri Fərman həmin tədbirdə şəxsən təqdim ediləcək.

"Dostluq məşəli" Cəmiyyətini sədri və eyniadlı qəzetin Baş redaktoru Fərman Borçalı, Hacı Ağaveyis Şirvani, tanınmış şair-dramaturq Ramiz Abdullayev, Salman Qazi, Sədi Yaradanqulu və başqaları alimə həsr etdikləri şeirləri oxuyublar.

Alimin qardaşı oğlu - tanınmış həkim Səməd Çobanov əmisini, oğlu - tanınmış filoloq-jurnalist Müşfiq Borçalı atasını, nəvəsi - BDU-nun hüquq fakültəsinin IV kurs tələbəsi, dərs əlaçısı Aytac Mədədli sevimli babasını təbrik etməklə yanaşı, həm də tədbir iştirakçılarına təşəkkür ediblər.

Sonda professor Mədəd Çobanov özü də tədbirin iştirakçılarına və təşkilatçılarına minnətdarlığını bildirib.

Sonra Yubiley tədbiri “Tural” restoranında bədii hissə ilə davam etdirilib.

Tanınmış şairlər, aşıqlar və incəsənət ustaları yubilyari ürəkdən təbrik edib, öz şeirləri və həzin mahnılari ilə tədbir iştirakçılarının şövqünü oxşayıblar. Aşıq Fikrətin, tnınmış müğənni Məsumə Nurun və başqalarının ifaları daha yaddaqalan olub.

80 il nədir ki...
Gözəl ailəsi, qazandığı çoxsaylı uğurlara əlavə Allahdan Mədəd müəllimə yalnız cansağlığı arzulayırıq!..


P.S.: Tədbirlə bağlı daha geniş video və foto-reportajımızı tezliklə dəyərli izləyicilərimizə təqdim edəcəyik...

Bizi izləyin...

Və onu da nəzərinizə çatdırır ki, yaxın günlərdə görkəmli alimin yubileyi Tiflisdə, Rustavidə, Borçalıda və doğma kəndi Darvazda da qeyd olunacaq...
Mədəd müəllimi sevən hər kəs həmin tədbirlərə dəvətlidir...

ZiM.Az





P.S.:

Yubiley tədbirinin Yüksək səviyyədə keçirilməsində böyük əməyi olan dəyərli ziyalılarımız - görkəmli alimlər, Atatürk Mərkəzinin rəhbəri, çox hörmətli Millət vəkili, akademik Nizami Cəfərova, AMEA Nəsimi adına Dilçilik İnstitutunun direktoru, akademik Möhsün Nağısoyluya, tanınmış elm xadimləri, professorlar Nizami Xudiyevə, Asif Hacılıya, Əjdər Ağayevə, Bədirxan Əhmədova, Nəbi Əsgərova, Minəxanım Nuriyeva-Tekleliyə, tanınmış telejurnalist və ictimai xadim - İsmayıl Ömərova, məşhur mesenat Ziya Abbasova, Əhməd Qəribova, Elşad Həsənova, İftixar Piriyevə, Həsən Həsənova, Natiq Hümbətova, İldırım Şükürzadəyə, Müsafir Məmmədova, Samir Müsafiroğluna, Ramiz Məmmədova, Günay Novruza, Meruf Rzayevə, Aşıq Fikret Ceferogluna, eləcə də adlarını çəkmədiyim digər dəyərli dostlarımıza, (onlar çoxdular, adlarını çəksəm uzun bir siyahı alınar), atamın həmkarlarına, tələbələrinə (professor Mahmud Kamaloğluna, Mehman Vəliyevə, Gultekin Aliyevaya, Rəna Aliyevaya, Nərminə Ramazanovaya, Mirvari Nuriyevaya, Sabir Quliyevə, Murtuz Ferhadoğlua, Zakir İsmayilova, Ötərxan Eltaca....)
tanınmış şairlər ƏliRza Xələfliyə, Salman Qaziyə, Hacı Ağaveyis Şirvaniyə, Ramiz Abdullayevə, Knyaz Aslana, Sədi Yaradanquluya, Azad Fərhadoğluna,

jurnalistlərimizə, Xususilə də, AZƏRTAC-a, AzTv, ATV, İTv, XəzərTv, LiderTv, SpeyceTV, Mədəniyyət TV kanallarına, "Azərbaycan", "Respublika", "Yeni Azərbaycan" qəzetlərinə, Vetenim.info , Zim.Az , Zirvə.info , reportyor.az , Borcali.org, sozcu.info , dialoq.info , xeberplus.info və s. saytlarına, Məzahir Süleymanzadəyə, Hafiz Rüstəmə, Dəyanət Osmanlıya, Hacı Azadə-Taleh Abbasqızına, bir sözlə, bütün iştirakçılara təşəkkür edir, öz dərin minnətdarlığımızı bildiririk.
Var olun!.. Min yaşayın!..
Nə yaxşı ki, Sizlər varsınız!..
(Çox xahiş edirik ki, heç kəs inciməsin...
Adlar və şəkillər əlavə olunur...)

Dərin hörmətlə,
Müşfiq BORÇALI.

.